PD bojkoton seancën plenare së të martës: Parlament pa debat
E Hënë 16 Mars 2026, 16:04
Dritare.net
Partia Demokratike ka vendosur të bojkotojë seancën plenare të thirrur për nesër, 17 mars, në orën 10:00, duke e konsideruar atë të paligjshme dhe të thirrur në shkelje të Rregullores së Kuvendit. Kryetari i grupit parlamentar të PD, Gazment Bardhi, deklaroi se kjo seancë nuk është një mbledhje normale parlamentare me debat dhe të drejtë fjalë për opozitën, por një axhendë e Kryeministrit Edi Rama dhe Kryetarit të Kuvendit. “Një parlament pa rend dite, pa debat dhe pa të drejtë fjalë për opozitën nuk është më parlament, por një dekor për propagandën e qeverisë,” tha Bardhi.
Deklarata e plotë e Bardhit!
“Grupi Parlamentar i Partisë Demokratike vendosi të mos marrë pjesë në seancën plenare të ditës së martë, një seancë e paligjshme, e thirrur në kundërshtim të hapur me Rregulloren e Kuvendit, jashtë ditës normale të saj (e enjte) dhe me Rend Dite: miratim procesverbali dhe njoftime.
Kjo nuk është një seancë normale parlamentare, por një mbledhje e thirrur për axhendën personale të Kryeministrit dhe të Kryetarit të Kuvendit, pa asnjë rend dite të miratuar apo të shpallur zyrtarisht, si dhe në shkelje të procedurave minimale që garanton Rregullorja e Kuvendit.
Një parlament pa rend dite, pa debat dhe pa të drejtë fjale për opozitën nuk është më parlament, por një dekor për propagandën e qeverisë. Një dyqan personal që nuk i shërben interesit publik.
Në vend që Parlamenti të merret me problemet reale të qytetarëve dhe të ushtrojë kontroll mbi qeverinë, ai është kthyer në një instrument antidemokratik në shërbim të Kryeministrit, duke penguar drejtësinë në hetimin e korrupsionit dhe duke u shndërruar në një pengesë serioze për anëtarësimin e plotë të Shqipërisë në Bashkimin Europian.
Për këtë arsye, opozita refuzon të bëhet pjesë e kësaj fasade parlamentare nesër dhe zgjedh të jetë aty ku duhet të jetë çdo opozitë e përgjegjshme: pranë qytetarëve.
Prioriteti ynë këtë javë mbetet takimi me qytetarët në të gjithë vendin dhe mobilizimi për protestën e 22 marsit. Sepse problemi real i Shqipërisë sot është një qeveri që është kthyer në rrezik kombëtar. Prandaj opozita është e vendosur të qëndrojë me qytetarët dhe të udhëheqë betejën për ndryshim, luftë me tolerancë zero ndaj korrupsionit, si dhe një qeverisje të përgjegjshme në shërbim të qytetarëve“./K.C/dritare.net
