Numërohen 1660 zarfe të Diasporës. Ja cila parti kryeson deri më tani!
E Hënë 12 Maj 2025, 08:08
Dritare.net
Procesi i numërimit të votave të diasporës për zgjedhjet parlamentare të Shqipërisë më 11 maj 2025 është në zhvillim e sipër. Nga 194,889 zarfe të mbërritura nga diaspora, deri më tani janë numëruar 1,660 zarfe. Sipas rezultateve paraprake të Komisionit Qendror të Zgjedhjeve (KQZ), Partia Demokratike (PD) kryeson me 43.95% të votave, e ndjekur nga Partia Socialiste (PS) me 42.68%. Partitë e tjera kanë marrë përqindje më të ulëta: Koalicioni "Nisma Shqipëria Bëhet" ka marrë 117 vota, Lëvizja Bashkë 21 vota, Partia Mundësia 35 vota dhe Partia Social Demokrate 34 vota.
Kjo është hera e parë që shqiptarët jashtë vendit kanë pasur të drejtën të votojnë me postë në zgjedhjet parlamentare. Pjesëmarrja ka qenë e lartë, rreth 78% e votuesve të regjistruar në diasporë kanë dërguar votat e tyre.
Ndërkohë, në Shqipëri, procesi i numërimit të votave vazhdon. Deri më tani janë numëruar 1,445 nga 5,225 kuti votimi, me PS që kryeson me 52.84% të votave, ndërsa PD ka marrë 34.26%./K.C/dritare.net
