Mesazhi i emigrantes nga Athina për Edi Ramën: Kam një kërkesë për ty!
E Enjte 3 Prill 2025, 12:12
Dritare.net
Po bëhen 3 dekada që Agentina Pacani jeton në Athinë. Atje lindi dy vajza. Tani, tashmë që ato po marrin rrugën e tyre në jetë, prindërit duan të kthehen. E në mos të kthehen, të kenë një shtëpi këtu në vendin e tyre, për të kaluar pleqërinë. E kanë menduar që kur nisën të vinin mënjanë lekët e para nga puna në Greqi, ndaj e blenë sot e vite të shkuara. Duan të ndërtojnë së paku një shtëpi, e mandej ndoshta edhe ndonjë biznes të vogël. Por diku, gjërat kanë ngecur. Ndaj ajo ka këtë thirrje për kryeministrin Edi Rama, me besimin se do ta dëgjojë dhe do të japë një zgjidhje sepse vetëm ftesa për t’u kthyer, për shqiptarët tanë nëpër botë nuk mjafton!
“Unë kam një problem me kadastrën. Unë bëj një kërkesë dhe përgjigja që marr prej më shumë se tre vjetësh është që kërkesa është në shqyrtim. Rama na ftoi edhe në takimin e fundit që patëm në Athinë, të kthehemi në vendin tonë. unë dua të bëj një shtëpi në Shqipëri, por leja e tokës është në shqyrtim. Dua vetëm një leje ndërtimi. A mund të kemi ne emigrantët një lehtësim që unë të kthehem dhe në atë tokë që kam të bëj një shtëpi dhe një minimarket të vogël? Këtë kërkesë dua t’ia drejtoj kryeministrit Edi Rama!”, u shpreh zonja Pacani në Dritare TV./L.F-dritare/net
