Maduro u arrestua para se amerikanët t’i shpërthenin dhomën e gjumit!
E Diel 4 Janar 2026, 10:10
Dritare.net
Politologu Ian Bremmer, themelues dhe drejtues i Eurasia, është shpesh i intervistuar nga mediat, por opinioni i tij sot është thuajse i domosdoshëm. Që nga vjeshta, ai ka qenë ndër të paktët që parashikoi një ndërhyrje ushtarake amerikane në Venezuelë. Në një intervistë për Corriere della Sera, ai thekson se Trump nuk mund të toleronte që Maduro të mbetej në pushtet pas gjithë asaj që qeveria amerikane ka thënë dhe bërë.
Bremmer kujton se muaj më parë Trump shpresonte që vetë krerët ushtarakë venezuelianë të largonin Maduron për të shmangur një ndërhyrje të gjerë të SHBA-së. Në mungesë të një grushti shteti, presidenti amerikan mori iniciativën:
Ushtarët nuk kryen grusht shteti, por bashkëpunuan: gjatë dy muajve të fundit, Uashingtoni zhvilloi marrëdhënie intensive me krerët e ushtrisë dhe, sipas burimeve, edhe me figura nga rrethi politik i Maduronit. Shumë punë e CIA-s, por edhe e shërbimeve sekrete ushtarake. Mendoj se diktatori dhe gruaja e tij janë arrestuar para mbërritjes së helikopterëve amerikanë; Delta Force vetëm i mori në dorëzim. Mungesa e reagimeve të mbrojtjes ajrore dhe neutralizimi i lehtë i sistemit të raketave tregon për një lloj kontributi të fshehtë të forcave të armatosura.
Kush do të qeverisë tani?
Trump ka qenë i paqartë, duke folur për një ne. Ai ka kërcënuar një valë të dytë pa hezituar të përdorë shprehjen «boots on the ground.
Nuk mendoj se do të jetë e nevojshme një ofensivë e dytë. Ushtria do të qeverisë sipas udhëzimeve të Uashingtonit. Ka pasur kontakte edhe me zëvendëspresidenten Delcy Rodriguez. Sigurisht, ishte zëvendëse e Maduros, por tani Trump nuk mendon për demokracinë: dëshiron njerëz që ndjekin direktivat e tij dhe mbajnë rendin. Nëse, siç thotë Marco Rubio, Rodriguez është e gatshme të bashkëpunojë, mund të mbetet në detyrë. Nuk ka një plan të strukturuar për të ardhmen, por operacioni ishte i planifikuar me kujdes. Pak orë pas sulmit, qeveria e Karakasit, përfshirë Rodriguez, denonconte ligjshmërinë e sulmit. Ndoshta shikimi i Maduronit në pranga, që do të gjykohet si trafikant droge, pati një efekt të madh».
Si do të ndikojë ndërhyrja amerikane në marrëdhëniet ndërkombëtare?
Rusia dhe Kina humbasin një partner të rëndësishëm, ndërsa rikthehet logjika e Amerikës Latine si oborr shtëpie i SHBA-së. A janë në shënjestër edhe vende të tjera si Kuba apo Kolumbia?
Jo, të paktën në afat të shkurtër. Objektivi kryesor ishte Venezuela me rezervat e saj të mëdha energjetike, trafikun e drogës dhe emigracionin masiv drejt SHBA-së. Do të duhet shumë kohë dhe punë për të stabilizuar vendin, për të rindërtuar infrastrukturën energjetike dhe për t’i dhënë një rol qendror kompanive amerikane.
Reagimet e Putinit dhe Xi Jinping?
Moska ka denoncuar shkeljen e së drejtës ndërkombëtare, në të cilën është eksperte, pasi e ka shkelur sistematikisht vetë. Kinezët nuk janë të kënaqur, sepse humbasin një burim energjie dhe një portë penetrimi në Amerikën Latine. Por, si pas bombardimit të Iranit, nuk do të shkojnë përtej një dënimi verbal. Për efektet ligjore afatgjata, SHBA-ja paraqet rastin si kapjen e një trafikanti droge me akuza të rënda që datojnë prej vitesh. Edhe Bashkimi Evropian nuk e ka konsideruar veprimin si i paligjshëm.
Reagimet brenda SHBA-së?
«Nëse arrin të stabilizojë Venezuelën, efekti për Trump mund të jetë pozitiv. Shumica e republikanëve e mbështetën rrëzimin e regjimit të paligjshëm të Maduronit. Sigurisht, MAGA janë kundër luftërave, por stërvitjet amerikane në terren ishin të pakta dhe për pak minuta: një operacion kirurgjikal pa viktima. Kjo duhet të jetë e pranueshme edhe për MAGA./ Pershtatur nga Corriere della Sera
