Macron: Nuk do të ketë më rrjete sociale për fëmijët nën 15 vjeç në Francë
E Martë 10 Qershor 2025, 21:09
Dritare.net
Presidenti i Francës, Emmanuel Macron, ka shpallur një vendim të rëndësishëm për mbrojtjen e të miturve në internet, duke njoftuar se qeveria do të ndalojë aksesin në rrjetet sociale për fëmijët nën moshën 15 vjeç. Ky vendim vjen pas shqetësimeve të shumta lidhur me ndikimet negative që mediat sociale kanë mbi shëndetin mendor dhe zhvillimin psikologjik të të rinjve.
Macron theksoi se teknologjitë duhet të jenë të sigurta dhe të përshtatshme për përdoruesit më të rinj, duke nënvizuar nevojën për masa më të forta mbrojtjeje. Ai bëri thirrje për një mobilizim europian për të harmonizuar rregullat dhe për të vendosur kufizime të ngjashme në të gjithë Bashkimin Evropian, duke u shprehur:
“Kjo nuk është vetëm një çështje franceze, por një sfidë e përbashkët e Evropës.”
Në Francë, kjo masë pritet të përfshijë verifikimin rigoroz të moshës gjatë regjistrimit në platformat sociale dhe mund të shoqërohet me gjoba për kompanitë që nuk respektojnë kufizimet.
Psikologë dhe ekspertë të shëndetit mendor kanë përshëndetur këtë vendim, duke theksuar rëndësinë e mbrojtjes së fëmijëve nga përmbajtjet e papërshtatshme dhe ndikimet negative të rrjeteve sociale.
Nga ana tjetër, përfaqësues të kompanive teknologjike kanë shprehur shqetësime për mënyrën e zbatimit dhe mundësinë e sfidave ligjore që mund të lindin nga kjo masë.
Partitë opozitare në Francë kanë mbështetur në mënyrë të përgjithshme idenë e mbrojtjes së fëmijëve, por disa kanë kërkuar që masat të jenë më të balancuara, për të mos kufizuar lirinë e përdorimit të teknologjisë dhe për të mos goditur përdoruesit më të rritur./K.C/dritare.net
