Dona Godaj: Zonja mbështesni njëra-tjetrën! Psikoterapia, e rëndësishme për të luftuar kancerin e gjirit!
E Mërkurë 18 Tetor 2023, 20:08
Dritare.net
Bardhyl Reso dhe Dona Godaj, drejtuese e YWCA of Albania të ftuar në emisionin Shqip nga Rudina Xhunga në DritareTV folën për kancerin e gjirit. Zonja Godaj dhe zoti Reso u shprehën se duhet që familjarët t’i mbështesin gratë e prekura nga kanceri i gjirit. Po ashtu është e rëndësishme që edhe vetë gratë e prekura nga kanceri i gjirit, por edhe ato që e kanë kaluar të mbështesin njëra-tjetrën.
Dona Godaj: Është e rëndësishme që gratë që e kanë kaluar kancerin e gjirit apo që trajtohen nga kanceri i gjirit të mbështesin njëra-tjetrën. Edhe familjarët duhet t’i mbështesin shumë. Të bëjnë humor në familje. Duhet të ngrihet morali i familjes. Ne kemi hapur një platformë që quhet fjongoroze.al dhe aty zonjat e prekura nga kanceri i gjirit që janë bërë anëtare aktive bëjnë biseda me mjekë, me psikologë. Janë rreth 250 gra. Kanë krijuar edhe një grup në WhtasApp dhe çdo ditë flasin me njëra-tjetrën.
Bardhyl Reso: Psikoterapia është një nga elementet kyçe për ketë sëmundje. Bisedat me njëra-tjetrën. Kur gratë i thonë njëra-tjetrës: “Unë e kalova, do ta kalosh dhe ti.” Deri ditën e fundit ato gra që janë të sëmura, kanë besim se do jetojnë. Prandaj kuraja që jepet, ndihma shpirtërore që jepet i ndihmon jashtëzakonisht shumë. Sëmundja është shumë e keqe, por njeriu duhet të bëjë të pamundurën për ta kapërcyer./K.C/dritare.net
