Bardhyl Reso: Si e kaloi bashkëshortja dy herë kancerin e gjirit!
E Mërkurë 18 Tetor 2023, 20:08
Dritare.net
Bardhyl Reso sot i ftuar në Shqip nga Rudina Xhunga në Dritare TV për të folur për kancerin e gjirit, tregoi për bashkëshorten e tij, e cila e ka kaluar dy herë, këtë sëmundje. Zoti Reso tregoi se hera e dytë, nuk ishte një rikthim i kancerit, pasi iu shfaq në gjoksin tjetër pas 15 vjetësh, nga rasti i parë.
“Që doktori të jetë i bindur që pacienti është pastruar totalisht nga kanceri, duhen të paktën 5 vjet. Në rastin e bashkëshortes time, qe një çudi. Ajo nuk ishte një përsëritje e kancerit të vjetër, por ishte një kancer i ri në gjoksin tjetër pas 15 vjetësh.
Për herë të parë ndodhi në moshën 51 vjeç. Asnjë shenjë nuk kishte shfaqur. Bënte kontroll vazhdimisht, por ato 2-3 vjetët e fundit kur ishim në Amerikë, nisi ta neglizhonte.
Kur u bisedua për operacionin e bashkëshortes, pjesa tumoriale ishte gati 5 cm, doktorët diskutuan që mund të hiqte njërin gjoks. Por mjeku hoqi vetëm pjesën tumoriale. Sëmundja u kap mes shkallës së dytë dhe të tretë që ishte një stad shumë delikat. Por bashkëshortja ime kishte një forcë të jashtëzakonshme.
Ajo kishte besim dhe thoshte që do ta kaloj. Kishte parë një ëndërr që i kishte dalë babai duke e thirrur me përkëledhi, dhe thënë se do ta kalosh.
Ndryshe i ndodhi një mikeshe të vjetër me të cilën kishin punuar dikur si mësuese në të njëjtën shkollë. Edhe ajo ishte prekur nga kanceri, ishte operuar në Greqi e më vonë erdhi në Amerikë për të vijuar trajtimet. Por asaj i ndodhi një fatkeqësi e madhe. I vdiq vëllai në duar, si pasojë e infarktit. Ajo tronditje e madhe ndikoi për keq. Bashkëshortja ime në bisedë me të gjithmonë i jepte kurajë. Por fatkeqësisht, ndërroi jetë, nuk e përballoi”, tregoi Reso në Shqip në Dritare TV./L.F-dritare.net
