LSI përjashton deputetin Përparim Spahiu, doli kundër reformës në drejtësi
E Hënë 27 Qershor 2016, 12:12
Dritare.net
Deputeti i qarkut të Dibrës, Përparim Spahiu është përjashtuar nga grupi parlamentar i Lëvizjes Socialiste për Integrim, pasi shprehu qëndrimin e tij kundër vetingut nga ndërkombëtarët për gjyqtarët dhe prokurorët.
Grupi i LSI-së theksoi se qëndrimi i deputetit Spahiu është personal. Për këtë çështje grupi i LSI-së u mblodh sot rreth orës 11:00, ku vendosi që të përjashtojë deputetin Spahiu.
Dy ditë më parë, deputeti i LSI-së Përparim Spahiu foli për rëndësinë e sovranitetit në përgjithësi, duke u fokusuar më pas tek çështja konkrete që lidhet me vetingun, për të cilën ai lë të kuptojë se e udhëhequr nga ndërkombëtarët do të çojë në një shkelje të sovranitetit të vendit.
“E kuptoj dhe jam dakord që sovranitetin e vendit tonë të përbashkët duhet ta ndajmë me NATO, me KE, shpresoj dhe me BE! Por nuk jam gati të votoj ndarjen e sovranitetit me Operacionin Ndërkombëtar të Monitorimit! Çfarë përfaqësojnë këta?!!”, – shkroi Spahiu.
Por çfarë është Operacioni Ndërkombëtar i Monitorimit që kundërshton deputeti i LSI-së? Në draftin e ndryshimeve kushtetuese që është dorëzuar në parlament, në aneksin e procesit të vetingut, në nenin “B” thuhet se kjo strukturë e përbërë nga ekspertë të huaj do të përzgjedhë nga vendet e tyre gjyqtarë dhe prokurorë, të cilët do të bëjnë rivlerësimin e gjyqtarëve dhe prokurorëve shqiptarë.
“Operacioni ndërkombëtar i Monitorimit do të mbështesë procesin e rivlerësimit nëpërmjet monitorimit dhe mbikëqyrjes së gjithë procesit. Ky operacion përfshin partnerët në kuadër të procesit të integrimit europain dhe bashkëpunimit euroatlantik dhe udhëhiqet nga Komisioni Europian”.
