Jam bërë një njeri i ndjeshëm. A ndryshon njeriu me vitet!
E Hënë 12 Maj 2025, 12:12
Dritare.net
Përshëndetje Dritare.net dhe psikologe Enertila. Unë që ju shkruaj jam një vajzë 25 vjeç. Problemi im është se jam një njeri shumë i ndjeshëm. Nuk kam qenë kështu më parë. Kuptoj se kam ndryshuar dhe gjithmonë e më tepër kjo po më shqetëson. Ju lutem ç’mund të më thoni ju në lidhje me mbindjeshmërinë time. Faleminderit!
Enertila Bekteshi përgjigjet!
Përshëndetje lexues të Dritare.net
Të qenit shumë i ndjeshëm nuk është një gjendje mjekësore, por një tipar personaliteti që mund të ndikojë në aspekte të ndryshme të jetës së përditshme . Njerëzit shumë të ndjeshëm jenë veçanërisht të vëmendshëm ndaj detajeve dhe ndryshimeve në mjedisin e tyre, por gjithashtu mund të shkaktojnë stres dhe lodhje në situata të mbingarkesës shqisore.
Në marrëdhëniet emocionale njerëzit shumë të ndjeshëm mund të përjetojnë përvoja shumë intensive dhe të thella. Ata mund të jenë partnerë të vëmendshëm dhe të kujdesshëm, të aftë për të kuptuar nevojat emocionale të të tjerëve. Megjithatë, e njëjta ndjeshmëri mund t'i bëjë ata të prekshëm ndaj lëndimit emocional dhe vështirësisë në menaxhimin e konfliktit. Njerëzit shumë të ndjeshëm i përpunojnë emocionet thellë dhe shpesh janë shumë të disponueshëm për të tjerët, duke vënë kështu nevojat e tyre në plan të dytë.
Në këndvështrimin tim e dashur lexuesja jonë unë për menaxhimin e mbindjeshmërisë do t’ju sugjeroja si fillim që të njohësh dhe të pranosh ndjeshmërinë si burim dhe jo si dobësi .Të kesh një hapësirë të qetë në shtëpi ose një vend të sigurt ku mund të shkarkosh stresin është thelbësore, ndaj do tu sugjeroja të keni një hapësirë të tillë.
Brenda kësaj hapësire mund të praktikoni teknika relaksi si lexim, qetësim ,apo edhe dhe teknika të frymëmarrjes që ju ndihmojnë. E dashur lexuesja jonë është e nevojshme të mësoni të thoni jo dhe të mbroni hapësirën personale për të shmangur mbingarkesën emocionale. Në përcaktimin e kufijve, është gjithashtu e dobishme të mësoni të kërkoni ndihmë duke krijuar një rrjet mbështetës rreth jush . Të qenit një person shumë i ndjeshëm sjell sfida unike, por edhe një mori përvojash emocionale dhe perceptuese.
Kuptimi dhe pranimi i kësaj karakteristike mund të çojë në një jetë më autentike dhe më të kënaqshme , të pasuruar nga vetëdija dhe lidhjet e thella me të tjerët . E dashur lexuesja jonë nuk ka terapi specifike ekskluzivisht për njerëzit shumë të ndjeshëm, por disa qasje terapeutike të integruara që të jenë të dobishme për të menaxhuar mbindjeshmërinë dhe për të përmirësuar cilësinë e jetës. Nëse situata juaj vazhdon për një periudhë të gjatë kohore është mirë të konsultoheni me një psikolog. Shpresoj shumë që këndvështrimi im t’ju ndihmojë në situatën tuaj. Gjithë të mirat ! /dritare.net
