U rrëzova para këmbëve të tij! Kështu nisi dashuria mes Natasha Lakos dhe Mevlan Shanajt!
E Hënë 29 Dhjetor 2025, 19:07
Dritare.net
Historia e dashurisë mes Natasha Lakos dhe Mevlan Shanajt është një nga më të njohurat në rrethet artistike shqiptare, por mënyra se si nisi mbetet unike. E ftuar në emisionin Dekalog nga Roland Qafoku në DritareTV, Lako tregoi me humor se takimi i tyre i parë nuk ishte një skenë romantike filmi, por një 'pengesë' e mirëfilltë në Qytetin Studenti.
'I thashë Mevlanit: nuk rashë në dashuri me ty, unë u pengova,' rrëfeu ajo duke qeshur. Lako përshkroi atmosferën e Qytetit Studenti si një oaz lirie ku të rinjtë nga gjithë Shqipëria takoheshin dhe ndërvepronin. Ajo vuri në dukje se Mevlani, student për aktor në atë kohë, ishte ai që ngulmoi për lidhjen, ndërsa ajo ishte më e rezervuar.
Intervista zbuloi edhe dinamikat e një çifti artistësh. Lako pranoi se ka pasur xhelozi, jo vetëm personale për shkak të adhurueseve të shumta të Mevlanit si aktor i pashëm, por edhe xhelozi profesionale. Ajo përmendi me shaka se si Mevlani i kishte hyrë 'në hise' duke botuar libra, apo se si ai rrallë konsultohej me të për zgjedhjen e aktorëve në filmat e tij, ndryshe nga regjisorët e tjerë që pyesnin gratë e tyre. Kjo marrëdhënie komplekse, e ndërtuar mbi art dhe pasion, ka prodhuar disa nga bashkëpunimet më të suksesshme në kinemanë shqiptare, si filmi 'Lule të kuqe, lule të zeza'./K.C/dritare.net
