Nga telefoni i kujt dolën bisedat e Ballukut? Gazetari zbulon gjithçka!
E Premte 7 Nëntor 2025, 16:04
Dritare.net
Me marrjen zyrtarisht e pandehur nga SPAK, e ardhmja politike e zëvendëskryeministres Belinda Balluku është vënë në pikëpyetje serioze. Aktualisht, ajo akuzohet për 'shkelje të barazisë në tendera', një vepër penale që dënohet me deri në pesë vite burg.
Megjithatë, gazetari Kujtim Topuzi argumenton se hetimet janë ende në fazë fillestare dhe ka një mundësi reale që akuza të rikualifikohet në një vepër më të rëndë, pasi të evidentohet plotësisht dëmi ekonomik dhe përfitimet e paligjshme. Përtej aspektit ligjor, presioni politik është i madh. Topuzi thekson se në një demokraci funksionale, një zyrtar i këtij niveli do të duhej të jepte dorëheqjen për t'u përballur me drejtësinë si një qytetar i barabartë, pa influencën e postit.
Mungesa e një hapi të tillë, e kombinuar me një ftohje të dukshme të marrëdhënieve publike me kryeministrin Edi Rama, siç tregohet nga mungesa e fotove të përbashkëta në rrjetet sociale, lë të kuptohet se pozita e saj është lëkundur thellë, duke e bërë të paqartë qëndrimin e saj afatgjatë në qeveri.
Në zemër të dosjes së SPAK kundër Belinda Ballukut qëndrojnë komunikimet e saj me vartësin Evis Berberi, të kryera përmes aplikacionit të enkriptuar 'Signal'. Ky aplikacion, i zgjedhur për sigurinë dhe fshehtësinë e tij, u kthye në 'Kutine e Pandorës' pasi Berberi dyshohet se i ruante këto biseda.
Këto mesazhe, që variojnë nga komunikime me tone personale e deri te direktiva të qarta për menaxhimin e tenderit, zbulojnë një marrëdhënie që shkon përtej asaj zyrtare. Një nga mesazhet më domethënëse është ai ku Balluku i jep 'bekimin' Berberit për emërimin e tij të ri, duke i kërkuar 'hermetizëm' dhe besnikëri, duke theksuar se 'e ardhmja e saj dhe e shumë të tjerëve' varej nga performanca e tij.
Ky nivel intimiteti dhe kontrolli në komunikim tregon një ndërhyrje direkte në procesin e tenderit, duke kompromentuar rëndë parimin e barazisë dhe pavarësisë së komisioneve. Zbulimi i këtyre bisedave nga SPAK, pas sekuestrimit të telefonit të Berberit, përbën shtyllën kryesore të akuzës për manipulimin e tenderit të Llogarasë./dritare.net
