Nëse Sokol Olldashi do ishte gjallë, PD do ishe në pushtet! Flet Igli Cara!
E Mërkurë 11 Shkurt 2026, 18:06
Dritare.net
Deputeti demokrat Igli Cara, i ftuar në emisionin Dekalog nga Roland Qafoku e konsideroi protestën si një reagim politik dhe qytetar ndaj situatës në vend, duke deklaruar se opozita ka të drejtën të organizojë tubime për të shprehur revoltën. Sipas tij, problemi kryesor qëndron te korrupsioni, të cilin e cilësoi si një “dhunë” që prek lirinë, ekonominë dhe të ardhmen e njerëzve, ndërsa solli në vëmendje edhe fenomenin e shpopullimit dhe vështirësitë ekonomike.
Gjatë bisedës u diskutua edhe tensioni në protestë dhe përplasjet me policinë. Cara shprehu keqardhje për efektivët e lënduar, por ngriti shqetësimin për mënyrën si u trajtuan disa të rinj të shoqëruar pas protestës, duke theksuar se nuk është normale mbajtja e të miturve për verifikime të gjata. Ai përmendi raste të të rinjve 16–17 vjeç të shoqëruar, duke e quajtur të pajustifikueshme që të miturit të trajtohen si të arrestuar për një periudhë të gjatë pa akuza të qarta.
Një tjetër moment i emisionit ishte debati mbi gjendjen e deputeti të PD Bledion Nallbati që u godit gjatë protestës. Igli Cara deklaroi se gjendja e tij është e qëndrueshme dhe se, sipas mjekëve, nuk ka rrezik për jetën, duke shtuar se ka komunikuar vetë me të dhe se ai është jashtë rrezikut.
Në pjesën politike të diskutimit, Qafoku ngriti çështjen e qëndrimit të Partisë Demokratike ndaj SPAK, duke vënë në dukje se institucionit i janë bërë sulme nga të dyja krahët politikë. Cara u shpreh se personalisht është në mbështetje të institucioneve të drejtësisë dhe tha se SPAK nuk duhet prekur, duke pranuar se mund të ketë pasur edhe probleme apo vendime të debatueshme, por pa e konsideruar të drejtë goditjen e tij si institucion.
Emisioni u ndal edhe te deklaratat e Qafokut për figurën e Sokol Bizhgës, ku moderatori dha opinionin e tij mbi karrierën e tij në polici dhe faktin që sipas tij është sulmuar politikisht, ndërsa Cara sqaroi se përgjegjësia në terren gjatë operacionit policor lidhet me hierarkinë dhe drejtimin e strukturave të rendit.
Në vijim, Qafoku e zhvendosi bisedën te problematikat e Durrësit, ku Cara foli për hidrovorin dhe përmbytjet, duke pretenduar se projekti i ri nuk funksionon si duhet dhe se janë shpenzuar fonde të konsiderueshme. Ai ngriti shqetësimin se hetimet duhet të ecin shpejt jo vetëm për përgjegjësit, por edhe për të ardhur te zgjidhja teknike.
Në fund, biseda u mbyll me një pjesë personale dhe politike për Sokol Olldashin. Qafoku e pyeti Carën se si do të ishte Partia Demokratike nëse Olldashi do të ishte gjallë. Cara e përshkroi Olldashin si njeri që e kishte PD “shtëpi politike” dhe tha se ai do të sillte një qasje më moderne dhe një rinovim të thellë në organizim dhe në mënyrën e të bërit politik. Ai shtoi se është i bindur se, po të ishte gjallë, PD do të kishte pasur një rrugë tjetër dhe se Olldashi ishte i përgatitur, i guximshëm në mendime dhe i hapur në komunikim./dritare.net
