Kush do të jetë 'Dumani' i ri i drejtësisë? Flet Gerta Meta!
E Mërkurë 10 Dhjetor 2025, 18:06
Dritare.net
Gerta Meta, drejtuese e Shoqatës për Kulturë Demokratike në një intervistë për Dekalog, Dritare TV foli për emërimet në tre institucionet kyçe, Byroja Kombëtare e Hetimit (BKH), Avokati i Popullit dhe Struktura e Posaçme Anti-Korrupsion (SPAK). Biseda nis me konfirmimin e Joni Ketës në krye të BKH-së, një figurë që vjen nga radhët e sistemit, i biri i një prokurori të njohur dhe me një trashëgimi familjare historike që ngjalli diskutime në studio.
Meta u ndal te debati mbi 'biografinë' dhe peshën e së shkuarës, duke konkluduar se në një demokraci funksionale, meritokracia dhe integriteti individual duhet të prevalojnë mbi çdo hije të historisë familjare. Megjithatë, pika më e nxehtë e diskutimit mbetet kaosi parlamentar për zgjedhjen e Avokatit të Popullit.
Situata përshkruhet si një ngërç politik ku mungesa e transparencës dhe lojërat me firma deputetësh kanë krijuar një situatë konfuze. Fakti që një institucion kaq i rëndësishëm për të drejtat e njeriut ka mbetur peng i mandateve të zgjatura përtej afateve ligjore, tregon për brishtësinë e konsensusit politik në Shqipëri.
Lidhur me garën për kreun e ri të SPAK, Meta i cilëson kandidatët – Adnan Xholi, Dorina Musabelliu, Elvin Gokaj dhe Klodian Braho si 'titanët' e drejtësisë, duke theksuar se secili prej tyre përfaqëson një profil të lartë profesional.
Ajo nënvizon rëndësinë që kreu i ri të mos jetë thjesht një administrator, por një lider që rrit besimin e publikut dhe komunikon qartë me qytetarët, duke thyer bunkerizimin e institucionit. Për Gerta Metën, shpresa mbetet te integriteti i individëve që marrin këto detyra dhe te mbështetja ndërkombëtare që garanton pavarësinë e tyre./dritare.net
