Jam një grua që ecën siç mundet një burrë! Rudina Xhunga Live- Pyetje- Pergjigje
E Shtunë 1 Nëntor 2025, 19:07
Dritare.net
Në një atmosferë të ngrohtë dhe plot kureshtje, gjimnazi “Turgut Ozal” priti një nga figurat më të njohura të gazetarisë, drejtuese e Dritare TV, Rudina Xhunga.
Takimi i organizuar në kuadër të muajit të letërsisë, shërbeu si një urë komunikimi mes brezit të ri dhe një gazetareje me një karrierë të pasur, e cila ka lënë gjurmë të pashlyeshme në mediat shqiptare.
E prezantuar nga nxënësit e shkollës, të cilët evidentuan pikat kyçe të karrierës së saj, nga fillimet në gazetën “Koha Jonë” deri te themelimi i platformës së saj online “Dritare”, Rudina ndau përvojën dhe vizionin e saj.
Rudina e nisi fjalën e saj duke falënderuar nxënësit për mikpritjen dhe energjinë e tyre, duke theksuar se nevoja për konfirmim dhe komunikim është universale, pavarësisht moshës apo profesionit.
Duke iu përgjigjur pyetjeve të shumta të nxënësve, gazetarja rrëfeu se dëshira e saj për gazetari nuk ishte një ëndërr e hershme, por një nevojë e brendshme për të komunikuar, e cila filloi me bisedat para pasqyrës dhe u transformua në një pasion për të treguar histori.
Ajo foli hapur për sfidat me të cilat është përballur si grua në një profesion shpesh të dominuar nga burrat, duke inkurajuar vajzat të guxojnë dhe të mos stepen para vështirësive.
“Unë jam një grua dhe mundem, siç mundet një burrë. Kam menduar që humbjen ta marr me sportivitet. Kam humbur dhe jam ngritur prapë,” tha ajo, duke dhënë një mesazh të fuqishëm.
Një nga pikat më interesante të diskutimit ishte kalimi i saj nga televizioni tradicional në platformën YouTube. Rudina e përshkroi këtë lëvizje si një nga sfidat më të mëdha, një hap drejt së panjohurës, por i domosdoshëm për t'iu përshtatur botës dixhitale dhe për të ruajtur pavarësinë editoriale.
“Nuk ka kohë të kthehesh pas. Bota po shkon para,” theksoi ajo, duke shtuar se pavarësisht frikës fillestare, kjo nismë i ka dhënë lirinë për të krijuar përmbajtje autentike dhe për të arritur një audiencë më të gjerë.
Në epokën e inteligjencës artificiale dhe lajmeve të shpejta, gazetarja mbrojti me forcë rëndësinë e gazetarisë njerëzore dhe fuqinë e leximit.
Ajo argumentoi se leximi na bën empatikë dhe më njerëzorë, duke na ndihmuar të kuptojmë veten dhe botën rreth nesh.
“E vetmja mënyrë për t'u bërë një çun dhe një vajzë e mirë është të lexosh,” tha ajo, duke shtuar se historitë njerëzore do të kenë gjithmonë vend në media, pasi ato mbajnë gjallë humanizmin tonë, përballë një bote gjithnjë e më të automatizuar.
Rudina e mbylli takimin me një mesazh shprese dhe frymëzimi për të rinjtë, të ndjekin pasionet e tyre, të mos kenë frikë nga dështimi dhe të punojnë për të ndërtuar një Shqipëri më të mirë./dritare.net
