Ish-ministri zbulon të vërtetën: Ja si u vodh thesari i shtetit në Krrabë!
E Hënë 19 Janar 2026, 18:06
Dritare.net
Vjedhja e Thesarit të Shtetit në tunelet e Krrabës mbetet një nga skandalet më të mëdha financiare dhe të sigurisë në historinë e Shqipërisë. Ish-ministri i Brendshëm Spartak Poçi, i cili menaxhoi zbulimin e ngjarjes, jep detaje rrëqethëse në emisionin Dekalog nga Roland Qafoku në DritareTV. Ai tregon se si policia, e cila ruante vetëm perimetrin e jashtëm dhe nuk kishte akses brenda tunelit, njoftoi për dëmtimin e njërës prej dyerve të blinduara. Hyrja në tunel kërkonte dy kode të ndryshme, njërin që e mbante policia dhe tjetrin Banka e Shqipërisë, duke e bërë teorikisht të pamundur vjedhjen pa bashkëpunim të brendshëm.
Gjatë inspektimit, skena ishte makabre: midis dyerve u gjet një dorë njeriu e prerë, e cila i përkiste një autori të panjohur që kishte tentuar të hynte me dhunë, ndoshta gjatë kaosit të vitit 1997. Poçi konfirmon se brenda dhomave të thesarit, arkat ishin shpartalluar dhe monedhat e floririt ishin derdhur përtokë. Ai hedh dritë mbi akuzat e kohës që implikonin Ilir Metën dhe zyrtarë të tjerë të lartë, duke i cilësuar ato si spekulime politike. Sipas tij, vjedhja kishte ndodhur shumë kohë para se Meta apo ai vetë të merrnin detyrat, dhe se provat tregonin për një vjedhje të organizuar nga persona që njihnin mirë sistemin e sigurisë, me shumë gjasë të ndihmuar nga dora e SHIK-ut gjatë trazirave. Mungesa e inventarëve të saktë e bëri të vështirë përcaktimin e dëmit real, duke e lënë këtë ngjarje si një njollë të errët të pazbardhur plotësisht./dritare.net
