Gara për kreun e ri të SPAK! Kush do të pasojë Altin Dumanin?
E Martë 4 Nëntor 2025, 19:07
Dritare.net
Me përfundimin e mandatit të Altin Dumanit, gara për drejtuesin e ri të Strukturës së Posaçme Antikorrupsion (SPAK) është bërë një nga temat më të nxehta.
Katër prokurorë kanë shprehur interesin për këtë post kyç: Adnan Xholi, i njohur për hetimin e dosjeve të 'Sky ECC'; Klodian Braho, i cilësuar si 'prokuror i hekurt' që ka hetuar edhe kolegë; Doloreza Musabelliu, me eksperiencë në hetimin e krimit të organizuar dhe korrupsionit; dhe Elvin Gokaj, me një karrierë të gjatë si drejtues prokurorish.
Gazetari Eni Ferhati parashikon një garë jashtëzakonisht të ngushtë, e cila mund të vendoset me vetëm një ose dy vota në Këshillin e Lartë të Prokurorisë (KLP). Ai thekson se brenda SPAK-ut ekzistojnë ndasi dhe 'klane' jo gjeografike, por miqësore dhe të bazuara në interesa, të cilat do të luajnë rol në këtë proces.
Përveç balancave të brendshme, ndikimi politik dhe ai i partnerëve ndërkombëtarë, veçanërisht i Shteteve të Bashkuara, do të jenë faktorë vendimtarë.
Sipas Ferhatit, ndryshe nga zgjedhjet e mëparshme, këtë herë qeveria nuk do të lejojë 'eksperimente' dhe do të përpiqet të sigurojë që në krye të SPAK të vijë një person që i përshtatet ekuilibrave të saj, duke e bërë procesin edhe më kompleks dhe të paparashikueshëm./dritare.net
