Adriana Kalaja: Martesa me Agustin Kolën dhe Tirana e viteve '80-të
E Martë 11 Nëntor 2025, 18:06
Dritare.net
Përtej figurës së fortë të opozitares, Adriana Kalaja ka ndarë në një rrëfim të rrallë detaje nga jeta e saj personale në Tiranën e viteve '80. Ajo kujtoi se si e njihte Edi Ramën që në rini, duke e përshkruar si shumë të zgjuar. Kalaja foli për karrierën e saj si sportiste e qitjes në klubin "Tirana" dhe martesën me një nga ikonat e futbollit shqiptar, Agustin Kola, të cilin e cilësoi si "Ronaldo i Shqipërisë" për talentin dhe përkushtimin e tij.
Ajo rrëfeu historinë romantike të njohjes së tyre pas ndeshjes së famshme Tirana-Vlora, ku tifozët vlonjatë mbollën fushën me patate, dhe ajo si një nga të paktat femra në stadium, përfundoi duke u kthyer në Tiranë me autobusin e ekipit. Një tjetër pjesë e rëndësishme e historisë së saj familjare lidhet me "Kafenë e Rremës", lokalin e njohur pranë poligonit të qitjes, i cili menaxhohej nga i ati i saj. Kalaja zbuloi se aty ishin klientë të rregullt edhe djemtë e elitës komuniste, si Iliri e Sokoli i Enver Hoxhës dhe djali i Mehmet Shehut.
Ajo tregoi një anekdotë ku i ati, Rrema, nuk u bënte lëshime as atyre, duke i detyruar të prisnin në rradhë, dhe se si emri popullor i lokalit i rezistoi edhe urdhrit të Mehmet Shehut për ta ndryshuar./dritare.net
