Princesha Kate flet hapur: Rikuperimi nga kanceri ishte një “roller coaster” emocional
E Mërkurë 2 Korrik 2025, 21:09
Dritare.net
Princesha e Uellsit, Kate Middleton, ka ndarë përvojën e gjatë të rikuperimit nga kanceri, duke përshkruar këtë periudhë si një “roller coaster” me luhatje emocionale dhe sfida të papritura.
Gjatë një vizite emocionale në Spitalin Colchester në Angli, ku takoi pacientë që po luftojnë me kancerin, Kate foli me sinqeritet për atë që shumë pacientë përjetojnë pas përfundimit të trajtimit. “Në fillim, të gjithë presin që të rikthehesh shpejt në normalitet,” tha ajo, “por në fakt, ajo fazë pas trajtimit është shumë e vështirë. Ti duhet të mbash një lloj fytyre të një njeriu të fortë, ndërkohë që brenda ndihesh i paqartë, i lodhur dhe i shqetësuar. Ti nuk je më i aftë të funksionosh si më parë, as në shtëpi, as në jetën e përditshme. Duhet të gjesh një normalitet të ri dhe kjo kërkon kohë,” tha ajo, duke theksuar rëndësinë e durimit dhe mirëkuptimit nga familja, miqtë dhe komuniteti.
Kate tregoi edhe se natyra dhe aktivitetet si kopshtaria, krijimtaria apo këndimi janë burime të mëdha ngushëllimi dhe forcimi gjatë kësaj kohe sfiduese. Në kopshtin e mirëqenies të Shoqatës Mbretërore Hortikulture në spitalin Colchester, ajo mbolli trëndafila të emëruar në nder të saj, një simbol shprese dhe ringjalljeje për të gjithë pacientët dhe familjet e tyre.
“Është shumë e rëndësishme që komunitetet të kenë mbështetje të tillë, ku njerëzit mund të ndihen të dëgjuar dhe të kuptuar,” tha Princesha Kate, e cila u shpreh se përvoja e kancerit i ka ndryshuar jetën thellësisht, jo vetëm për veten e saj, por edhe për familjen që ka me Princin William dhe tre fëmijët e tyre të vegjël.
“Një diagnozë kanceri është një pikë kthimi në jetë,” tha ajo. “Është ndryshimi më i madh që mund të përjetosh, jo vetëm për pacientin, por edhe për familjen e tij. Dhe shpesh, kjo ndikim nuk shihet menjëherë, por rritet me kalimin e kohës. Është një rrugë që kërkon forcë, mbështetje dhe shumë durim.”
Kjo vizitë shënon një tjetër hap të rëndësishëm në kthimin e Princeshës Kate në angazhimet e saj publike pas periudhës së trajtimit, duke dhënë një mesazh të fuqishëm për të gjithë ata që po luftojnë me sëmundjen: “Nuk jeni vetëm, dhe ndihma ekziston.”/K.C/dritare.net
