Nga Rama te Hillary dhe Bill Clinton. Ja të ftuarit në dasmën e Alex Soros dhe Huma Abedin!
E Enjte 12 Qershor 2025, 22:10
Dritare.net
Në mesin e verës, më 14 qershor 2025, Hamptons do të bëhet skena e një prej dasmave më të përfolura të vitit. Huma Abedin, ish-këshilltarja e ngushtë e Hillary Clinton dhe një nga figurat më të rafinuara të politikës amerikane, pritet të martohet me Alex Soros, filantrop dhe kryetar i fondacionit Soros, djali i miliarderit George Soros.
Ceremonia do të zhvillohet në pronën e familjes Soros në Southampton, një rezidencë madhështore me 12 dhoma gjumi, një bibliotekë private, fusha tenisi dhe pishinë. Ftesat janë dërguar me shumë shije: letër ngjyrë krem me shkronja smeraldi, një prekje elegante që përçon stilin e rafinuar të çiftit.
Lista e të ftuarve është po aq mbresëlënëse sa vendndodhja: Hillary dhe Bill Clinton pritet të jenë të pranishëm, së bashku me figura të njohura nga bota e politikës, modës dhe medias, përfshirë Anna Wintour, Chelsea Clinton, Nicky Hilton. Sipas burimeve, do të jetë edhe kryeministri shqiptar Edi Rama.
Ndërsa përgatitjet po shkojnë drejt fundit, pritet që shumë të ftuar të përdorin helikopterë për të shmangur trafikun veror të Long Island, duke shtuar edhe më shumë shkëlqim në këtë ngjarje mondane.
Çifti ka preferuar të ruajë privatësinë për detajet e ceremonisë, por sipas miqve të afërt, dasma do të reflektojë një kombinim të elegancës klasike me elemente moderne, një pasqyrim i stilit të dyshes që prej kohësh ka tërhequr vëmendjen e mediave dhe publikut.
Një dashuri që nisi në sfondin e rrethit elitar politik amerikan, po kurorëzohet tani me një premtim për të ardhmen, e në këtë dasmë, gjithçka tingëllon si nga një faqe libri që shkruhet me finesë dhe dashuri./K.C/dritare.net
