Foto/ Melania Trump dhe Kate Middleton vjedhin vëmendjen në Windsor!
E Mërkurë 17 Shtator 2025, 16:04
Dritare.net
Vizitat shtetërore nuk janë vetëm për politikë dhe marrëveshje, por shpesh kthehen në një pasarelë të sofistikuar ku moda flet po aq fort sa diplomacia. Kjo u dëshmua sot në Windsor Castle, ku të gjithë sytë nuk ishin vetëm te presidenti amerikan Donald Trump dhe Mbretëri Charles III, por mbi dy figurat që i dhanë elegancë dhe hijeshi skenës: zonja e parë Melania Trump dhe Princesha e Uellsit, Kate Middleton.
Kate Middleton shfaqi një elegancë klasike të përhershme. Ajo kishte zgjedhur një coat-dress vishnjë nga stilistja Emilia Wickstead, të kombinuar me një kapele nga Jane Taylor dhe një çantë Chanel. Pamja e saj u plotësua nga brosha e famshme me tre pendë, simbol i titullit Prince of Wales, duke i dhënë veshjes jo vetëm bukuri, por edhe peshë historike. Ngjyra e fortë vishnje i dha princeshës autoritet dhe forcë, ndërsa qëndrimi i saj i qetë e vendosi natyrshëm në qendër të vëmendjes.
Nga ana tjetër, Melania Trump solli një frymë më moderne e të guximshme. Zonja e parë u shfaq me një kostum Dior, që theksonte linjat e saj. Pika më e spikatur e pamjes ishte kapelja në ngjyrë të purpurt, e cila binte në sy dhe krijonte harmoni të qëllimshme me kravatën e Presidentit Trump. Në udhëtimin drejt Mbretërisë së Bashkuar, Melania kishte zgjedhur një trench-coat klasik Burberry, çizme Dior dhe syze Saint Laurent, duke kombinuar luksin amerikan me stilin britanik.
Dy zonjat e para të stilit nuk ishin thjesht të veshura bukur, por dërguan mesazhe të qarta përmes pamjes së tyre. Zgjedhja e markave britanike tregoi respekt ndaj vendit mikpritës, ndërsa detajet e rafinuara si brosha mbretërore dhe ngjyrat e forta komunikuan fuqi, mister dhe elegancë. Ishte një moment ku tradita u takua me modernitetin dhe ku moda u shndërrua në gjuhë diplomatike.
Në një ditë të mbushur me ceremoni zyrtare, marrëveshje miliardëshe dhe protesta jashtë kështjellës, Melania Trump dhe Kate Middleton arritën të krijojnë një tjetër histori, atë të elegancës që bashkon kulturat dhe shndërron një vizitë politike në një ngjarje mode. Në Windsor, politika pati rëndësinë e saj, por ishte stili i këtyre dy zonjave që i dha ngjarjes hijeshinë dhe shkëlqimin që do të kujtohet gjatë./K.C/dritare.net
