Aktorët dhe yjet e Hollivudit i thonë lamtumirë Matthew Perry: Jemi të shkatërruar!
E Diel 29 Tetor 2023, 09:09
Dritare.net
Ish-kolegët dhe yjet bëjnë homazhe për Matthew Perry, i cili ndërroi jetë të shtunën në mbrëmje në shtëpinë e tij në Los Angeles. Aktori 54-vjeçar, i dashur për portretizimin e Chandler Bing-ut sarkastik në serialin hit Friends, u gjet i vdekur në vaskë pasi u mbyt pas një arresti kardiak, tha përfaqësuesi i tij për NBC News.
Maggie Wheeler, e cila luajti të dashurën e Chandler, Janice në serial, tha se gëzimi që Perry u solli "shumë njerëzve" në "jetën e tij të shkurtër do të vazhdojë të jetojë. Ndihem kaq e bekuar për çdo moment krijues që ndajmë.” shkruan ajo në Instagram.
Morgan Fairchild, e cila luajti nënën e Chandler, Nora Bing, tha: "Jam thellësisht e pikëlluar nga vdekja e parakohshme e 'djalit' tim... Humbja e një aktori kaq të ri të shkëlqyer është një tronditje."
Kryeministri kanadez Justin Trudeau, i cili e njihte Mathew Perry-n që fëmijë kur nëna e Perry-t punonte si ndihmëse e babait të tij, kryeministrit kanadez Pierre Trudeau, e përshkroi vdekjen e tij si "tronditëse dhe trishtuese". “Nuk do t'i harroj kurrë lojërat që kemi luajtur në oborrin e shkollës dhe e di që njerëzit në mbarë botën nuk do ta harrojnë kurrë gëzimin që u solli. Faleminderit për të gjitha të qeshurat, Matthew. Do të na mungosh!”, tha ai.
Aktori Wendell Pierce, i cili luajti së bashku me Perry në xhirimin e The Odd Couple, shkroi: “Për dy vjet Mathew Perry ishte shefi im, kolegu im dhe një njeri karizmatik, i sjellshëm, qesharak. Unë lutem dhe shpresoj që ai të jetë në paqe."
Aktorja Selma Blair shkroi në Instagram se Perry ishte “shoku i saj më e vjetër”. “Ne të gjithë e donim Matthew Perry-n dhe unë e doja shumë. Çdo ditë. E doja pa kushte. Dhe ai mua. Sot jam e shkatërruar, e lënduar. Ëndrra të ëmbla Matty. Ëndrra të ëmbla”.
Mira Sorvino, e cila luajti me Perry-n në filmin Parallel Lives të vitit 1994, shkroi: “Oh jo!!! Mathew Perry!! Shpirt i ëmbël, i trazuar!! Gjeje paqen dhe lumturinë në Parajsë, duke i bërë të gjithë të qeshin me shpirtin tënd unik!!!”
Aktorja Paget Brewster, e cila luajti të dashurën e Chandler, Kathy në sezonin e katërt të Friends shkroi:: “Ai ishte i mrekullueshëm për mua në Friends dhe sa herë e shihja atë për dekada që nga ajo kohë. Ju lutemi lexoni librin e tij. Ishte trashëgimia e tij. Për të nuk ka qetësi. Ai tashmë është shumë i zënë duke i bërë të gjithë të qeshin atje lart."
Transmetuesi Piers Morgan e quajti Perry-n "një aktor i madh, por një djalë shumë i torturuar. Autobiografia e tij e fundit për jetën e tij të shkatërruar nga varësia ishte një nga më të fuqishmet, më të sinqertat dhe zbulueset që kam lexuar ndonjëherë. Një lajm kaq i trishtuar.”
Warner Bros TV, i cili prodhoi Friends, përmes një reagimi tha: "Ne jemi të shkatërruar nga vdekja e mikut tonë të dashur Matthew Perry!
Matthew ishte një aktor jashtëzakonisht i talentuar dhe një pjesë e pashlyeshme e familjes së grupit televiziv Warner Bros. Ndikimi i gjeniut të komedisë u ndje në mbarë botën dhe trashëgimia e tij do të vazhdojë të jetojë në zemrat e shumë njerëzve. Kjo është një ditë e rëndë dhe ne i dërgojmë dashurinë tonë familjes së tij, të dashurve të tij dhe të gjithë të fansave të tij.”, thuhet më tej në deklaratë.
Llogaria zyrtare e Friends në X, e njohur më parë si Twitter, shkroi: “U shkatërruam kur mësuam për vdekjen e Matthew Perry. Ishte një dhuratë e vërtetë për të gjithë ne. Zemrat tona janë me familjen e tij, të dashurit dhe të gjithë fansat e tij.”/K.C/dritare.net
