Intervistë për punë? Pyetja që bllokon kandidatët dhe si t’ia dilni mbanë!
E Diel 1 Shtator 2024, 14:02
Dritare.net
"Mund të na tregoni për veten tuaj?" Kjo është një nga pyetjet më të zakonshme dhe në të njëjtën kohë më të vështira që mund t'ju bëhen gjatë një interviste pune.
Shumica e intervistuesve e përdorin këtë pyetje si një mjet për të thyer akullin. Por përballja me një ftesë kaq të madhe për të folur për veten tuaj mund t’ju bëjë nervozë.
"Edhe pse është pyetja më e zakonshme në një intervistë pune, ajo largon shumë njerëz," thotë Julia Pollak, kryeekonomiste në ZipRecruiter, për CNBCmakeit. "Shumë kandidatë kapen në befasi dhe përsërisin të gjithë CV-në e tyre."
Meqenëse pyetja "më trego për veten" zakonisht bëhet në fillim të një interviste pune, përgjigja juaj mund të vendosë si do të shkojë pjesa tjetër e bisedës.
"Nëse jepni një përgjigje të gjatë dhe të mërzitshme, kjo mund të çojë në një përfundim të shpejtë të intervistës." thotë Jeff Hyman, rekrutues ekzekutiv për 28 vjet. "Ju nuk duhet ta filloni me një përmbledhje të gjatë të historisë së jetës suaj. Në vend të kësaj, konsiderojeni thyerjen e akullit si një mundësi për të lënë një përshtypje të parë të mirë.”, thotë ai, informon dritare.net
Përgjigja juaj për këtë pyetje duhet të jetë një prezantim i shkurtër, hyrës (jo më shumë se 1-2 minuta) që nxjerr në pah disa nga pikat tuaja të forta, përvojën përkatëse dhe pse jeni të emocionuar për këtë pozicion.
Ju gjithashtu mund të konsideroni të përmendni një sfidë të fundit që keni kapërcyer në karrierën tuaj dhe atë që ju mësoi, shton Hyman.
"Duket kundërintuitive, por pak kandidatë do të mendojnë ta bëjnë këtë, kështu që do të tërheqë vëmendjen e rekrutuesit," shpjegon ai. “Kur kërkoj nga kandidatët të më tregojnë për veten e tyre, unë jam duke kërkuar për vetëdije dhe pjekuri, dhe të flasësh me besim për sfidat e tua më tregon se i ke ato cilësi”.
Për shembull: “Një nga përvojat e mia përcaktuese të karrierës ishte puna ime e parë jashtë kolegjit. Personi që më punësoi u largua menjëherë pasi fillova të punoja dhe në fillim ishte e vështirë të përshtatesha me stilin e menaxhimit të shefit tim të ri, por kjo përvojë më mësoi se si të jem më i adaptueshëm dhe të bashkëpunoj në mënyrë efektive në punë.”
Nëse nuk ndiheni rehat kur diskutoni për një dështim, Hyman sugjeron të gërshetoni një shembull se si keni demonstruar lidership në punë për t'i bërë përshtypje intervistuesit.
Për shembull: “Një gjë që kam mësuar kohët e fundit për veten time është se kam një pasion për të udhëhequr një ekip dhe për të bashkuar njerëzit rreth një kauze. Në kompaninë time të mëparshme, unë isha bashkëdrejtues i një prej grupeve tona të burimeve të punonjësve. Kam organizuar programe vullnetare së bashku me disa kolegë të mi, një eksperiencë shumë e këndshme”.
Rekrutuesit përdorin gjithashtu pyetjen "më trego për veten" për të vlerësuar besimin dhe për të kuptuar qëllimet dhe prioritetet tuaja, tha William Vanderbloemen, CEO i firmës së kërkimit ekzekutiv Vanderbloemen, për CNBC Make It.
Është e rëndësishme të përshtatni përgjigjen tuaj për punën për të cilën po intervistoheni, shpjegoi Vanderbloemen, duke u fokusuar në aftësitë dhe përvojat që janë më të rëndësishme./K.C/dritare.net
