Hamasi ka reaguar ndaj propozimeve amerikane për armëpushim duke i pranuar ato pjesërisht, por duke kërkuar negociata të mëtejshme mbi disa pika kyçe. Në një deklaratë, grupi tha se pranon “lirimin e të gjithë pengjeve izraelite, të gjallë dhe të vdekur, sipas formulës së shkëmbimit të përfshirë në propozimin e Presidentit Trump”, nëse kushtet e terrenit për këto shkëmbime do të plotësohen.
Megjithatë, deklarata thotë se Hamasi kërkon negociata të mëtejshme mbi çështje të tjera që lidhen me të ardhmen e Rripit të Gazës dhe të drejtat e popullit palestinez, duke theksuar se këto pika ende po diskutohen.
Plani i Trump, i hartuar bashkë me kryeministrin izraelit Benjamin Netanyahu, përmban 20 pika dhe parashikon fundin e luftës në Gaza, lirimin e pengjeve izraelite dhe një proces rindërtimi për enklavën e shkatërruar. Ai kërkon çarmatimin e Hamasit, shkatërrimin e plotë të infrastrukturës së tij mbi dhe nën tokë, si dhe vendosjen e një force ndërkombëtare sigurie të udhëhequr nga vende arabe.
Në kuadër të marrëveshjes, Izraeli do të lironte mbi 1,900 palestinezë të burgosur, përfshirë 250 të dënuar me burgim të përjetshëm, ndërsa Hamasi do të dorëzonte 48 pengje, prej të cilëve rreth 20 besohet se janë ende gjallë. Pas kësaj, anëtarët e Hamasit mund të përfitonin amnisti nëse pranojnë të heqin dorë nga armët dhe të bashkëjetojnë paqësisht.
Plani gjithashtu parashikon një strukturë kalimtare qeverisëse në Gaza nën mbikëqyrjen e një “Bordi Paqeje” ndërkombëtar, deri në reformimin e Autoritetit Palestinez, duke synuar hapjen e një rruge të besueshme drejt vetëvendosjes palestineze dhe shtetësisë.
Megjithatë, zyrtarët amerikanë thonë se brenda Hamasit ka ndasi për këtë propozim, veçanërisht lidhur me çarmatimin dhe dorëzimin e trupave të pengjeve. Komunikimet e vështira midis drejtuesve politikë jashtë Gazës dhe komandantëve ushtarakë në territor duket se kanë vonuar përgjigjen.
Sipas ish-diplomatëve, Hamasi mund të shprehë gatishmëri për negociata, por pritet të kërkojë ndryshime në disa pika të planit.
