Elton Ilirjani shkëlqen në Javën e Modës në Tokio!
Wednesday 2 September 2026, 13:01
Dritare.net
Elton Ilirjani rikthehet në një prej skenave më të rëndësishme të modës botërore. Supermodeli shqiptar ishte pjesë e dy shfaqjeve të Global Fashion Collective, në kalendarin zyrtar të Rakuten Fashion Week Tokyo Spring/Summer 2027.
Dy pasarela, dy stilistë dhe dy interpretime krejt të ndryshme.
Në shfaqjen e stilistit japonez SHINO, Eltoni ishte personazhi kryesor i prezantimit. Me një pamje dramatike dhe teatrale, ai nuk prezantoi thjesht një veshje, por u bë pjesë e historisë së koleksionit, duke tërhequr gjithë vëmendjen e publikut.
Në koleksionin e stilistit amerikan Perry Jones, Eltonit iu besua dalja finale. I veshur me një kostum të kuq me teksturë metalike, në kontrast të plotë me paraqitjen e parë, ai e mbylli pasarelën me një tjetër interpretim të fuqishëm.
Dy stilistë, dy estetika dhe dy role kryesore që e bënë praninë e Elton Ilirjanit në Tokio të pamundur për t’u kaluar pa u vënë re.
Rrugëtimi i tij në kryeqytetin japonez nuk mbeti vetëm në pasarelë. Getty Images realizoi një set fotografik me Eltonin në rrugët e Ebisu-t, gjatë Javës së Modës në Tokio.
Nga pasarela te fotografia editoriale, Tokio shënoi një tjetër kapitull të rëndësishëm në rrugëtimin ndërkombëtar të Elton Ilirjanit, modelit shqiptar që po kthehet në një prani të spikatur në skenat botërore të modës.
