Zbulohen bisedat private të Biden me Netanjahun: Bibi, ti nuk ke asnjë strategji?!
E Martë 8 Tetor 2024, 18:06
Dritare.net
Marrëdhëniet midis presidentit amerikan Joe Biden dhe kryeministrit izraelit Benjamin Netanyahu janë tensionuar gjithnjë e më shumë që nga pranvera e vitit 2024, sipas librit të ri të gazetarit legjendar amerikan Bob Woodward "Lufta”.
Në librin e tij të ri, që pritet të dalë më 15 tetor, Bob Woodward jep një pamje të papërpunuar të bisedave të administratës së Bidenit pas dyerve të mbyllura dhe momenteve rreth mënyrës sesi ata i trajtuan krizat ndërkombëtare, nga tërheqja katastrofike nga Afganistani deri te përballja me Putinin kur ai pushtoi Ukrainën deri te grindjet me Netanyahun. Bisedimet në prapaskenë ofrojnë një pasqyrë të bisedave të Bidenit me liderët botërorë dhe komentet që presidenti amerikan kishte privatisht rreth tyre, nga Netanyahu te presidenti rus Vladimir Putin, shkruan CNN.
Libri zbulon gjithashtu detaje të reja në lidhje me bisedat private të Donald Trump me Putinin dhe një dërgesë sekrete të pajisjeve të testimit Covid-19 që Trump i dërgoi presidentit rus për përdorim personal gjatë kulmit të pandemisë.
Lidhur me Izraelin dhe luftën në Lindjen e Mesme, sipas fragmenteve nga libri, gjatë një telefonate në prill, Biden e pyeti Netanyahun: "Cila është strategjia juaj, o njeri?" “Duhet të pushtojmë Rafahun”, përgjigjet Netanyahu, duke iu referuar qytetit në Rripin jugor të Gazës, që atëherë ishte bastioni i fundit i Hamasit në enklavën palestineze. "Bibi, ti nuk ke asnjë strategji," ia ktheu Biden.
Në maj, forcat izraelite pushtuan Rafahun në një operacion të kufizuar që shkoi shumë më mirë nga sa kishin parashikuar SHBA. Atë muaj prill, Izraeli vrau dy gjeneralë të Gardës Revolucionare në ambasadën iraniane në Damask, Siri. Pasi SHBA dhe aleatët e tjerë ndihmuan Izraelin të kapte shumicën e raketave të lëshuara nga Irani si kundërpërgjigje, Biden i kërkoi Netanyahut të mos përgjigjej, duke i thënë që "ta merrte si fitore".
Por pakënaqësia e Bidenit ndaj Netanyahut vloi ndërsa lufta vazhdoi të përshkallëzohej. Pasi ushtria izraelite hyri në Rafah, Biden tha për Netanyahun: "Ai është një gënjeshtar i vjetër". “Ky zoti… Bibi Netanyahu, është një djalë i keq”, tha Biden në biseda private, sipas Woodward./K.C/dritare.net
