Vrasja e 11-vjeçares Lyhanna trondit Francën, shpërthejnë protesta masive
E Martë 9 Qershor 2026, 18:06
Dritare.net
Në Francë ka shpërthyer zemërim i madh pas vrasjes së një vajze 11-vjeçare, Lyhanna, duke nxjerrë në rrugë mbi 60,000 protestues në mbarë vendin. Protestuesit po kërkojnë dorëheqjen e Ministrit të Drejtësisë, Gérald Darmanin.
Indinjata lidhet me faktin se i dyshuari, 41-vjeçari Jérome Barella, ishte raportuar më parë në polici për abuzim seksual ndaj një vajze tjetër, por autoritetet nuk e kishin marrë në pyetje për muaj të tërë, pavarësisht provave mjekësore që tregonin abuzim.
Lyhanna u zhduk pas daljes nga shkolla dhe trupi i saj u gjet disa ditë më vonë në një fermë pranë Fleurance në jugperëndim të Francës. I dyshuari është ndaluar, por mohon vrasjen, duke pranuar vetëm se e kishte marrë vajzën me makinë për një xhiro.
Çështja ka hapur debat të madh në Francë për dështimet e sistemit të drejtësisë në trajtimin e rasteve të abuzimit seksual ndaj të miturve. Ministri Darmanin ka pranuar “dështime serioze” të shtetit, por ka refuzuar dorëheqjen dhe thotë se problemi nuk është mungesa e ligjeve apo fondeve, por prioriteti i dobët i këtyre rasteve.
Qeveria franceze tani po shqyrton qindra mijëra ankesa të pazgjidhura për abuzime ndaj të miturve dhe po diskuton ashpërsimin e ligjeve për mbrojtjen e fëmijëve./dritare.net
