Tajvani goditet nga tërmeti vdekjeprurës, më i forti në 25 vjet!
E Mërkurë 3 Prill 2024, 08:08
Dritare.net
Tajvani është goditur nga tërmeti më i fortë në 25 vjet, duke shkaktuar shembje të ndërtesave dhe ndërprerje të gjerë të energjisë elektrike. Agjencia e monitorimit të tërmeteve të Tajvanit tha se tërmeti i sotëm ishte me magnitudë 7.2 të shkallës Rihter, ndërsa Shërbimi Gjeologjik i SHBA-së e vlerësoi atë në 7.4 dhe agjencia meteorologjike e Japonisë 7.7, citon Sky News.
Tërmeti çoi në një cunami të vogël në disa zona bregdetare të Japonisë, por paralajmërimet u hoqën më vonë. Numri i viktimave nuk dihet pasi shumë njerëz kanë mbetur të bllokuar në banesat e tyre, si pasojë e lëkundjeve të forta. Sipas mediave të huaja, lëkundjet u ndjenë në orën 7:58 të mëngjesit. Epiqendra e tij ishte rreth 22 milje e thellë dhe rreth 11 milje në jugperëndim të Hualien. Shërbimet e trenave në të gjithë Tajvanin, e cila është shtëpia e 23 milionë njerëzve u pezulluan, ashtu si edhe metroja. Legjislatura kombëtare në Taipei, një shkollë e konvertuar e ndërtuar para Luftës së Dytë Botërore, gjithashtu pati dëmtime në mure dhe tavane. Shkollat evakuuan nxënësit e tyre në fusha sportive, duke i pajisur me helmeta të verdha sigurie. Disa gjithashtu u mbuluan me tekste shkollore për t'u mbrojtur nga objektet që binin ndërsa vazhduan pasgoditjet.
Agjencia meteorologjike e Japonisë e përshkroi tërmetin si shumë të cekët, i cili mund të shkaktojë dëme më të mëdha. Agjencia tha gjithashtu se njerëzit duhet të jenë vigjilentë për pasgoditjet, të cilat mund të jenë me intensitet të ngjashëm për rreth një javë./M.K-dritare.net
