Pamjet/ Momenti kur cunami godet Rusinë, Japoninë dhe Hawaii-n pas tërmetit 8.8
E Mërkurë 30 Korrik 2025, 10:10
Dritare.net
Pas një tërmeti të fuqishëm me magnitudë 8.8 që goditi gadishullin Kamçatka në lindjen e largët të Rusisë, valët e para të cunamit kanë mbërritur në Hawaii, ku është regjistruar një valë 1.2 metra (4 këmbë) e lartë pranë Oahu.
Autoritetet në Hawaii, në disa pjesë të bregut perëndimor të SHBA-ve dhe në Japoni kanë urdhëruar evakuime masive si pasojë e rrezikut nga cunami. Guvernatori i Hawaii-t, Josh Green, u ka kërkuar banorëve të ndjekin urdhrat e evakuimit dhe të ruajnë qetësinë, ndërsa presidenti amerikan Donald Trump ka paralajmëruar qytetarët që të jenë të vëmendshëm ndaj njoftimeve zyrtare për cunami.
Në Japoni, rreth 1.9 milionë njerëz janë urdhëruar të evakuohen, ndërkohë që një valë cunami me lartësi 1.3 metra (4.3 këmbë) ka goditur prefekturën veriore të Iwate, sipas agjencisë meteorologjike japoneze.
Alarmi për cunami është dhënë edhe në disa vende të tjera përreth Oqeanit Paqësor, përfshirë Kinën, Filipinet, Indonezinë, Guamin, Perunë dhe Ishujt Galapagos në Ekuador, me nivele të ndryshme paralajmërimi.
Autoritetet ndërkombëtare janë në gatishmëri të plotë për të ndjekur zhvillimet dhe për të mbështetur evakuimet dhe ndihmën emergjente në zonat e prekura./K.C/dritare.net
Δείτε αυτή τη δημοσίευση στο Instagram.
