Momentet e fundit të Papa Françeskut. Ata lajmëruan ambulancën, por gjendja u përkeqësua në pak minuta
E Martë 22 Prill 2025, 21:09
Dritare.net
Papa Françesku ndërroi jetë brenda gjysmë ore, mëngjesin e së hënës, zbulojnë burime të mirëinformuara të Vatikanit.
Papa Françesku, siç raportohet në Sky News, u zgjua në orën 6 të mëngjesit të së hënës dhe ishte mirë për të paktën një orë. Rreth orës 7 të mëngjesit, njësia mjekësore e Vatikanit mori një telefonatë urgjente nga banesa e tij Santa Marta ku kishte zgjedhur të jetonte.
Stafi mjekësor shqyrtoi ndër të tjera mundësinë e transferimit të Papës në spitalin Gemelli, ku ai ishte shtruar për pneumoni në shkurt dhe mars.
Po ashtu edhe policia e Romës mori një kërkesë urgjente për shoqërimin e Papës pas orës 7 të mëngjesit, thanë burimet.
Megjithatë, gjendja e Papa Françeskut u përkeqësua shpejt dhe kërkesa u anulua. Françesku i tundi kokën infermierit të tij personal Massimiliano Strapetti dhe ra në koma.
Papa Françesku u nda nga jeta në orën 7:35 në moshën 88-vjeçare.
"Ai nuk vuajti, gjithçka ndodhi shumë shpejt.", thanë të pranishmit për Vatican News, media zyrtare e Selisë së Shenjtë.
“Faleminderit që më ktheve në shesh!" Këto ishin fjalët e Papa Françeskut drejtuar infermierit personal, i cili e nxiti të bënte një udhëtim të fundit në sheshin e Shën Pjetrit me automjetin special të dielën e Pashkëve.
Kjo ishte një nga frazat e fundit të Papës para vdekjes së tij, sipas Vatican News.
Pas bekimit tradicional “Urbi et Orbi” nga ballkoni i Bazilikës së Shën Pjetrit, Papa Françesku u shfaq në “Popemobile” në sheshin e Shën Pjetrit, për habinë e mijëra besimtarëve që ishin mbledhur për Pashkë./K.C/dritare.net
