Mediat izraelite: Netanyahu gati të propozojë ripushtimin e plotë të Gazës
E Martë 5 Gusht 2025, 16:04
Dritare.net
Kryeministri izraelit Benjamin Netanyahu pritet t’i propozojë kabinetit të sigurisë një plan për ripushtimin e plotë të Rripit të Gazës, sipas mediave izraelite. “Shorti është hedhur. Do të marrim kontrollin e plotë të Gazës dhe do të mposhtim Hamasin”, citohet të ketë thënë një zyrtar i lartë izraelit.
Ky propozim vjen mes kundërshtimeve të forta brenda vetë strukturave ushtarake të Izraelit. Shefi i shtabit të ushtrisë dhe drejtues të tjerë të lartë raportohet se kundërshtojnë planin, ndërsa zyrtari i lartë cituar nga mediat shtoi: “Nëse kjo nuk i pëlqen shefit të shtabit, le të japë dorëheqjen.”
Në sfond të këtyre përplasjeve, familjet e pengjeve paralajmërojnë se një ofensivë e re ushtarake rrezikon seriozisht jetën e të afërmve të tyre. Më shumë se 50 izraelitë mbahen ende peng në Gaza, por besohet se vetëm 20 prej tyre janë ende gjallë.
Sipas sondazheve, 75% e izraelitëve janë në favor të një marrëveshjeje armëpushimi për të kthyer pengjet, në vend të një përshkallëzimi të luftës.
Ndërkohë, aleatë të afërt ndërkombëtarë të Izraelit pritet ta dënojnë një veprim të tillë, ndërsa presioni për t’i dhënë fund luftës dhe për të zbutur krizën humanitare në Gaza sa vjen e rritet.
Brenda vetë Izraelit, qindra ish-zyrtarë të lartë të sigurisë, përfshirë ish-drejtorë të agjencive të inteligjencës, i kanë dërguar një letër Presidentit amerikan Joe Biden, duke e kërkuar ndërhyrjen e tij për t’i dhënë fund luftës.
Njëri prej tyre, ish-kreu i inteligjencës së brendshme Ami Ayalon, deklaroi për BBC-në se veprimi ushtarak është bërë i kotë. “Nga pikëpamja ushtarake, Hamasi është shkatërruar. Por si ideologji, po fiton terren mes palestinezëve, në rrugët arabe dhe botën islame. E vetmja mënyrë për të mposhtur ideologjinë e Hamasit është të ofrosh një të ardhme më të mirë.”
Zhvillimet e fundit vijnë pasi bisedimet e ndërmjetësuara për armëpushim dhe shkëmbim pengjesh kanë dështuar, ndërsa grupet palestineze të armatosura kanë publikuar tre video tronditëse ku shfaqen dy pengje izraelitë në gjendje të rënduar shëndetësore.
Në njërën prej videove, Evyatar David, i rrëmbyer nga festivali “Nova” më 7 tetor 2023, shihet duke hapur një varr që thotë se është i tij, në një tunel nëntokësor. Pamjet kanë tronditur opinionin publik izraelit dhe kanë rritur presionin mbi qeverinë e Netanyahut./K.C/dritare.net
