SHBA-të kanë nënshkruar një marrëveshje me Kievin për të ndarë fitimet nga shitja e ardhshme e rezervave minerale dhe energjetike të Ukrainës, pas disa muajsh negociatash të tensionuara.
Marrëveshja synon të ofrojë një nxitje ekonomike për SHBA-të që të vazhdojnë të investojnë në mbrojtjen dhe rindërtimin e Ukrainës. Ukraina besohet se ka rezerva të mëdha mineralesh si grafiti, titani dhe litiumi. Ato janë shumë të kërkuara për shkak të përdorimit të tyre në energjinë e rinovueshme, teknologjinë ushtarake dhe infrastrukturën.
Sekretari i Thesarit të SHBA-së, Scott Bessent, tha se kjo tregonte se të dyja palët ishin të përkushtuara për paqe dhe prosperitet të qëndrueshëm në Ukrainë. Marrëveshja parashikon gjithashtu krijimin e një fondi investimi për të nxitur rimëkëmbjen ekonomike të Ukrainës nga lufta. Gjuha e njoftimit të kësaj marrëveshjeje tregon shumë më tepër solidaritet me Ukrainën sesa është parë deri tani nga administrata Trump. Ai i referohet "pushtimit në shkallë të plotë të Rusisë" dhe shton se "asnjë shtet apo person që financoi ose furnizoi makinën ruse të luftës nuk do të lejohet të përfitojë nga rindërtimi i Ukrainës".
Kremlini ende nuk i është përgjigjur marrëveshjes.
Për Kievin, ajo shihet si thelbësore për të aksesuar ndihmën ushtarake amerikane. Zëvendëskryeministrja e Ukrainës, Yulia Svyrydenko - e cila fluturoi për në Uashington për të nënshkruar marrëveshjen të mërkurën - tha në një postim në X se fondi i ri do të "tërheqë investime globale në vendin tonë".
Duke renditur dispozitat e marrëveshjes, ajo tha se do të përfshinte projekte në minerale, naftë dhe gaz, megjithëse burimet do të mbeteshin pronë e Ukrainës. Partneriteti do të jetë i barabartë, në bazë 50:50, shtoi ajo, dhe duhet të ratifikohet nga ligjvënësit në Kiev. Sipas marrëveshjes, SHBA-të do të kontribuojnë me ndihmë të re për Kievin, shtoi ajo, duke përfshirë sistemet e mbrojtjes ajrore. Presidenti Donald Trump ka këmbëngulur vazhdimisht për marrëveshjen si një parakusht për ofrimin e çdo garancie sigurie në të ardhmen për Kievin.
Çështja kryesore është se drafti i marrëveshjes tregon se Ukraina do t'i japë Uashingtonit akses në disa nga burimet e saj natyrore në këmbim të ndihmës së ardhshme të sigurisë nga SHBA-ja. Por kjo është dukshëm më pak se ajo që kishte dashur Trump, e cila ishte të merrte mbrapsht të gjithë ndihmën ushtarake amerikane të dhënë që nga fillimi i luftës. Marrëveshja u vonua pasi autoritetet amerikane thanë se Kievi po përpiqej të bënte ndryshime të minutës së fundit. Marrëveshja vjen në mes të një lufte tregtare të SHBA-së me Kinën, nga ku burojnë 90% e rezervave aktuale të metaleve të rralla në botë./L.F-dritare.net
