Armëpushim apo paqe? Ja çfarë u arrit nga bisedimet për luftën në Gaza!
E Enjte 9 Tetor 2025, 21:09
Dritare.net
Presidenti i Egjiptit, Abdel Fattah El-Sisi, ka bërë thirrje për zbatimin e menjëhershëm të një armëpushimi në Rripin e Gazës, edhe pse qeveria izraelite ende nuk e ka miratuar plotësisht marrëveshjen me Hamasin.
Deklarata e tij erdhi gjatë një takimi në Kajro me një delegacion amerikan, në përbërje të të cilit ishin i dërguari për Lindjen e Mesme, Steve Witkoff, dhe këshilltari Jared Kushner, sipas një zëdhënësi të presidencës egjiptiane.
Pas një serie takimesh intensive diplomatike në orët e fundit, duket se po afrohet një moment vendimtar për konfliktin në Rripin e Gazës. Një zëdhënës izraelit njoftoi se Forcat e Mbrojtjes së Izraelit (IDF) do të ripërqendrohen në një vijë të re pas arritjes së armëpushimit, duke ruajtur kontrollin mbi rreth 53% të territorit të Gazës.
Në të njëjtën kohë, Presidenti i SHBA-së, Donald Trump, pritet të vizitojë Izraelin dhe Egjiptin gjatë fundjavës, si pjesë e një turi diplomatik në Lindjen e Mesme që synon forcimin e marrëveshjes së sapoarritur për ndalimin e luftimeve.
Në terren, organizatave humanitare u është dhënë sinjal pozitiv për të shtuar ndihmat për popullsinë e Gazës, sapo të miratohet faza e parë e marrëveshjes së armëpushimit.
Ndërkohë, në Paris, ministrat e jashtëm arabë dhe evropianë po zhvillojnë një takim për të diskutuar mënyrat se si mund të mbështesin përfundimin e luftës. Sekretarja e Jashtme e Mbretërisë së Bashkuar, Yvette Cooper, theksoi se “nuk mund të ketë asnjë rol për Hamasin në qeverisjen e ardhshme të Gazës.”
Në Izrael, familjet e pengjeve si dhe banorët palestinezë në Gaza kanë pritur me festime dhe shpresë njoftimin për armëpushim, duke e parë atë si një hap të parë drejt lehtësimit të krizës humanitare.
Megjithatë, kryekorrespondentja ndërkombëtare Lyse Doucet paralajmëron se kjo është një marrëveshje armëpushimi dhe jo një paqe e qëndrueshme. Sipas saj, shumë çështje të rëndësishme – përfshirë statusin e pengjeve, kufijtë dhe sigurinë afatgjatë – mbeten ende të pazgjidhura në tryezën e negociatave./L.F-dritare.net
