Tërmet i fuqishëm në Indonezi. Mbi 40 viktima deri më tani!
E Hënë 21 Nëntor 2022, 11:11
Dritare.net
Një tërmet ka goditur ishullin kryesor indonezian Java, duke lënë më shumë se 40 të vdekur dhe qindra të plagosur, sipas zyrtarëve lokalë. Tërmeti me magnitudë 5.6 goditi qytetin Cianjur në Java Perëndimore, në një thellësi të cekët prej 10 km (6 milje), sipas të dhënave të Shërbimit Gjeologjik të SHBA.
Lëkundjet u ndjenë në kryeqytetin Xhakarta rreth 100 km larg, ku njerëzit në ndërtesat e larta u evakuuan.
Zyrtarët paralajmërojnë për pasgoditje të mundshme dhe thonë se numri i të vdekurve mund të rritet.
Zona ku goditi tërmeti është me popullsi të dendur dhe të prirur për rrëshqitje dheu, me shtëpi të ndërtuara keq. Ekipet e shpëtimit janë përpjekur të evakuojnë njerëzit nga ndërtesat e shembura dhe kanë arritur të shpëtojnë një grua dhe foshnjën e saj, sipas raporteve lokale.
Herman Suherman, kreu i administratës në qytetin Cianjur, tha për mediat lokale se të paktën 46 persona ishin vrarë.
"Viktimat vazhduan të vinin nga shumë zona. Rreth 700 njerëz u plagosën," tha ai për TV Kompas.
Më herët, agjencia e lajmeve AFP e citoi atë të thoshte se shumica e lëndimeve ishin fraktura të kockave të marra nga njerëzit e bllokuar nga mbeturinat në ndërtesa.
Ambulancat vazhdojnë të vijnë nga fshatrat në spital, tha ai. Ka shumë familje në fshatra që nuk janë evakuuar. Videot në mediat sociale tregonin shkatërrimin e shtëpive dhe dyqaneve.
Dhjetra ndërtesa janë dëmtuar në rajonin Cianjur, tha në një deklaratë Agjencia Kombëtare e Zbutjes së Fatkeqësive. Ato përfshijnë një spital dhe një shkollë me konvikt islamik./BBC/Xh.Xh/dritare.net
