Tronditet futbolli anglez/ Manchester City shpallet fajtor për shkeljet financiare, çfarë rrezikon klubi!
Friday 25 September 2026, 18:06
Dritare.net
Manchester City është shpallur fajtor për shumicën dërrmuese të 115 shkeljeve të rregullave financiare të Premier League për të cilat ishte akuzuar, sipas raportimeve të mediave britanike.
BBC Sport raporton, duke iu referuar burimeve të saj, se një komision i pavarur e ka deklaruar fajtor, klubin anglez për shumicën e akuzave. Ndërkohë, The Athletic dhe The Times raportojnë se Manchester City është shpallur fajtor për 114 nga 115 akuzat. Klubet e tjera të Premier League janë informuar për vendimin, ndërsa tashmë pritet të mësohet se çfarë sanksionesh mund të përballet Manchester City.
Çështja nisi zyrtarisht në shkurt të vitit 2023, kur Premier League ngriti më shumë se 100 akuza ndaj City-t pas një hetimi disavjeçar. Akuzat lidhen me periudhën që nis nga sezoni 2009-2010 dhe përfshijnë pretendime për mosdhënie të informacionit të saktë financiar, të ardhurat e klubit, marrëveshjet e sponsorizimit, pagesat dhe respektimin e rregullave financiare të Premier League.
Seancat para komisionit të pavarur përfunduan në dhjetor të vitit 2024, pas disa muajsh shqyrtimi.
Megjithatë, çështja nuk konsiderohet ende e mbyllur. Manchester City ka deklaruar se “procesi i Premier League mbetet në vazhdim”, ndërsa raportimet e mediave britanike bëjnë të ditur se klubi pritet ta apelojë vendimin.
Edhe Premier League nuk ka bërë ende publik vendimin. Një zëdhënës i ligës, i cituar nga Reuters, tha se bëhet fjalë për një proces konfidencial dhe se Premier League nuk do të komentojë në këtë fazë.
Tashmë vëmendja zhvendoset te masat që mund të merren ndaj kampionëve të shumëfishtë të Anglisë. Rregullat parashikojnë një gamë sanksionesh në rast se shkeljet provohen, ndërsa ekspertët e financave të futbollit paralajmërojnë se pasojat e çështjes mund të jenë të konsiderueshme.
Manchester City i ka mohuar vazhdimisht akuzat dhe, që prej ngritjes së tyre në vitin 2023, ka këmbëngulur se disponon prova që mbështesin pozicionin e klubit./dritare.net
