Nga Malvina Tare
Dje ishte 1 qershori, dita e dashur nga të gjithë fëmijët, pa e ditur ende se çfarë përfaqëson për ta. E megjithatë prindërit kujdesen të organizojnë festa, të dhurojnë lodra, e veç tyre edhe lumturi e dashuri më shumë se zakonisht.
Nëse flasim për fëmijët sot e kuptojmë se vetëm festat nuk mjaftojnë. Ajo që duhet nga pas është një sistem edukimi, vlerash dhe dijesh të pakonkurueshme.
Fëmijët janë pjesë e rëndësishme e jetës së një kombi dhe rritja e tyre e arsimimi ëahtë vetë thelbi i asaj se çfarë e pret vendin.
Po dje, portalet dhe revistat u mbushën me fytyrat e lumtur të fëmijëve të personazheve Vip. Luizi dhe Kiara kishin 1 qershorin e parë, e më pas të gjithë Vipat me radhë.
Jo se jam kundër personazheve Vip dhe fëmijëve të tyre, por shikoj se ende fëmijë të lumtur dhe të denjë për kopertina janë ata që veshin fustane të shtrenjta, që janë të kuruar deri te fija e flokut dhe ata që vazhdojnë më tej famën e prindërve të tyre.
Fëmijë të famshëm për kopertinat e 1 qershorit për mua nuk ofrojnë simbolikën e kësaj dite. Nuk më japin as dritë e as shpresë për të ardhmen e shokëve të tyre më të thjeshtë. Për miliona fëmijë të tjerë që festojnë në lagjet e mbushura me familje të ardhura në Tiranë, apo fëmijë nga lagjet e krijuara me familje të reja, që me gjithë sakrificat vazhdojnë të jetojnë në kryeqytet. Qindra fëmijë të tjerë janë në rrethe, që nuk i kanë prindërit Vip, por edhe ata kanë festuar e gëzuar mes kursimit të 5 lekëve për të dhuruar lumturi e buzëqeshje në një ditë për fëmijët e tyre.
Fëmijët e Astirit, Yzberishtit, Kuçovës, Durrësit, Vlorës e gjithë fshatrave të Shqipërisë, meritojnë kopertinën dhe shansin për të qenë shembull.
Sepse një kopertinë është një reklamë, një mesazh që vjen heshtur, por të vjen.
Një mesazh se ai që shfaqet është shembull për t’u ndjekur, dhe të thuash të drejtën Shqipërisë sot i duhet shembulli i punës më shumë se kurrë.
Mjaft me fasada në kopertina që nuk i blen më njeri.
Shqipërisë i duhet shembulli i kampionatit të shahut, të notit, të matematikës, të gjuhës, të vrapit, të pikturës, të volejbollit. Fëmijët duhet të nxiten, të mbështeten, të shkëlqejnë.
Me studine, me punë, jo me para dhe reklamë.
I mësoni fëmijët se askush nuk lind Vip dhe Vip nuk është profesion e as status social.
Një status i fortë social është ai që ndërtohet nga një karakter i fortë, nga dije dhe vlera të brumosura, jo nga pozat e Instagramit.
Mendoj se sot më shumë se asnjëherë duhet të flasim hapur me fëmijët dhe t’u japim shansin të ëndërrojë gjithsecili se ai mund të jetë edhe kryeministri i ardhshëm, qoftë biri i një minatori, pastrueseje apo ministri a prokurori./dritare.net
