Rama në mbledhje të qeverisë: Të rilindim Frontin Demokratik
E Hënë 10 Janar 2022, 15:03
Dritare.net
Të dashur shokë dhe shoqe, pas ngjarjeve të së shtunës, duhet të nxjerrim disa përfundime që të përmirësojmë jo vetëm punën tonë, por edhe të opozitës. Zhvillimet e fundit kanë sjellë paqartësi në kampin demokrat, ndaj ne duhet t’i japim një dorë në mënyrë që beteja e tyre të vazhdojë, në mënyrë që të fitojë më i miri.
Së pari, duhet një rakordim më i mirë mes policisë dhe zotërinjve Berisha dhe Basha që në të ardhmen mos të na krijohen konflikte të tipit “pse e solle para kohe” apo “pse e vonove policinë se desh na vdiqën”. Këto teknalitete nuk dua t’i dëgjoj më!
Së dyti, duhet t’i japim Gaz Bardhit gaz lotsjellës pasi spray me piper i Gridës që përdori, është për gra dhe ata tropojanët nuk para pyesin.
Providenca siç duket e ka caktuar që Gaz Bardhi të ketë lidhje me gazin, ndaj jepini ca rezerva nga ato të policisë dhe mësojeni si hidhet.
Së treti, të shtypet një hartë e thjeshtë me udhëzime sesi shkohet nga stacioni i furgonave tek selia e PD-së ose kryeministria, sipas agjendës që do të kenë vëllezërit opozitarë për objektet që do të sulmojnë. Për këtë duhet të lidheni me shtabin e zotit Berisha që mos të kemi vonesa në shtypjen e fletëpalosjeve.
Së katërti, hapini dyert për ata anëtarë të PD që nuk e shohin veten më pjesë të këtij konflikti. Për këto prurje duhet të krijojmë edhe Frontin Demokratik që të marrë pjesë në zgjedhjet e radhës si organizatë më vete, pasi nuk mund ta lemë pluralizmin politik pre të tekave të Berishës dhe Bashës.
Mendojmë që kjo javë do të jetë e qetë derisa Berisha të mbledhë veten, se helbete, moshë e shkuar dhe duhet parë mundësia e gjetjes së një 'personal trainer' për të në mënyrë që ta sjellim në formë për sezonin e dimër-pranverës./dritare.net
