Xhandarmëria serbe shkel territorin, reagime të forta në Kosovë!
E Shtunë 8 Gusht 2020, 16:04
Dritare.net
Në Kosovë prej mbrëmjes së djeshme janë rritur tensionet për shkak se raportohet se xhandarmëria serbe ka shkelur territorin e Republikës pa lejen e autoriteteve kosovare.
Kryeministri Avdullah Hoti ka thënë se të gjitha organet përkatëse janë angazhuar për vlerësim të rastit, ndërsa shton se shpejt do të ketë raport të detajizuar.
Ish-kryeministri Ramush Haradinaj ka shkuar në fshatin që xhandarmëria serbe ka hyrë mbrëmë.
Haradinaj e ka quajtur këtë veprim “provokim” të xhandarmërisë serbe duke shtuar se institucionet e Kosovës duhet të ofrojnë siguri për qytetarët.
Kryetari i Nismës Socialdemokrate, Fatmir Limaj, ka reaguar pas hyrjes së xhandarmërisë serbe në Karacevë të Kamenicës.
Limaj ka siguruar qytetarët e asaj pjese se nuk do të jenë asnjëherë vet.
Ai ka thënë se provokimet e herë pas hershme të forcave ushtarake serbe në fshatrat e brezit kufitar brenda territorit të Kosovës duhet të marrin përgjigjen e duhur nga ana e institucioneve tona të sigurisë dhe KFOR-it./ I.M-Dritare.net
