Vera që nuk e la kurrë Shqipërinë: Këtu ka ar, lum kush e punon dhe e kërkon!
E Mërkurë 24 Janar 2024, 20:08
Dritare.net
Që prej 1994 Vera Çeço mbledh bimë të ndryshme medicinale në mbarë vendin. Ajo e nisi punën e saj, në vitet më të vështira për vendin në mes të trazirave më një barake, ndërsa sot në terren ka mbi 1 mijë punëtorë dhe një fabrikë ku grumbullon e përpunon bimët medicinale, duke i eksportuar edhe jashtë vendit.
E ftuar në emisionin Shqip nga Rudina Xhunga në Dritare TV, zonja Çeço tregoi se e gjithë Shqipëria është e pasur me bimë medicinale. Vetëm në Delvinë thotë agronomia, gjenden mbi 100 lloje bimësh me veti të jashtëzakonshme në shëndet.
“Aktivitetin tim e kam nisur në vitin 1974. Kam punuar në ndërmarrjen e grumbullimit në Delvinë, deri në vitin 1994. Ndërmarrja kishte rreth 300 punëtorë dhe e gjithë puna bëhej në mënyrë artizanale me dorë. Ka pasur fabrika të ngjashme edhe në disa në disa qytete të tjera të mëdha si Korçë apo Tepelenë, por në Delvinë, ishte më e madhja.
Ndërmarrja funksionoi deri në vitin 1994. Në atë kohë çdo ndërmarrje u shkri dhe mbeta e papunë. Duke mbetur e papunë kërkoja të filloja të punoja diku, seose isha kryefamilajre me një unë mbeta e papunë. Për këtë arsye duke qenë e vetme, kryefamiljare me një vajzë, duhet patjetër të punoja. Jeta në atë kohë nuk ishte aspak e lehtë, por duke qenë e dashuruar me bimët dhe me profesion agronome, e shfrytëzova për të bërë atë që doja.
Një shoqe e imja më ndihmoi duke ofruar një barake të vogël që ishte 6 me 7 metra. Nisëm të punonim aty të dyja, deri në ‘97. Pastaj në ‘97 pavarësisht se situata ishte shume e keqe unë punoja. Madje ato vite i shfrytëzova për të rritur më shumë aktivitetin tim, sepse njerëzit pas rënies së Piramidave, njerëzit iu kthyen punës.
Punova në atë barake të vogël deri në vitin 2005 kur bleva një godinë të rrënuar nga 1997 dhe e rikonstruktova. Unë kryesisht punoj në Delvinë, në të gjitha fshatrat, në Libohovë, Limat, Fushë-Bardhë, Himarë, Konispol.
Çajin e malit e marr në Delvinë në malin e Sopotit dhe në Libohovë në Çajup. Që kur kam nisur punën time nuk i jam ndarë terrenit. Shkoj në çdo vend për t’i mësuar gratë si ta korrin dhe ta ambalazhojnë çdo bimë medicinale. I njoh të gjithë njerëzit me të cilët punoj. Ndërsa bimët i kam si fëmijët. E dua shumë Delvinën, por po aq edhe Delvina më do mua. Kjo më ka ndihmuar që biznesi të ecë”, u shpreh zonja Çeço në Dritare TV./L.F-dritare.net
