Samiti ndërqeveritar Itali–Shqipëri: Gjigandi italian dhe KAYO nënshkruajnë marrëveshje për krijimin e një sipërmarrjeje të përbashkët
E Premte 14 Nëntor 2025, 21:09
Dritare.net
Të enjten, gjatë samitit ndërqeveritar Itali–Shqipëri të mbajtur në Romë, nën drejtimin e Kryeministres së Italisë Giorgia Meloni dhe Kryeministrit të Shqipërisë Edi Rama, kompanitë Fincantieri dhe KAYO firmosën një Memorandum Mirëkuptimi (MoU) për krijimin e një sipërmarrjeje të përbashkët (JV) që do të merret me ndërtimin dhe mirëmbajtjen e anijeve në Shqipëri.
Në ceremoninë e nënshkrimit ishin të pranishëm Pierroberto Folgiero, CEO dhe Drejtor i Përgjithshëm i Fincantieri, si dhe Ardi Veliu, CEO i KAYO-s. Sipas marrëveshjes, sipërmarrja e përbashkët do të shërbejë si kontraktori kryesor për projektet e ndërtimit dhe mirëmbajtjes së mjeteve detare për tregun shqiptar.
Për projektet e destinuara për eksport, JV-ja do të ketë kapacitetin të ndërtojë anije deri në 80 metra gjatësi dhe 800 ton zhvendosje. Në këto raste, Fincantieri do të veprojë si kontraktori kryesor, ndërsa realizimi i punimeve të ndërtimit të anijeve do t’i besohet JV-së së re./dritare.net
