“Sab”, romani që u shkrua për 30 vjet: Historia e një familjeje shqiptare
E Diel 30 Nëntor 2025, 20:08
Dritare.net
Romani 'Sab' nuk është thjesht një libër, por projekti letrar i një jete. Artur Spanjolli zbulon se embrioni i kësaj vepre lindi që në vjeshtën e vitit 1993, pak pasi ishte kthyer në Firence me dokumente për studime. I frymëzuar nga teknikat narrative të mjeshtrave si William Faulkner dhe Gabriel García Márquez, ai nisi të shkruante jo vetëm për përvojat e tij si emigrant, por për historinë e thellë të familjes së tij.
'Sab' ka kaluar një proces të gjatë maturimi dhe transformimi. I shkruar fillimisht në shqip, më pas i përshtatur në italisht dhe i rishkruar sërish në gjuhën amtare, romani është rezultat i një pune dhjetëravjeçare. Spanjolli shpjegon se versioni përfundimtar në shqip është më i plotë dhe më i pjekur, pasi pasqyron edhe rritjen e tij si shkrimtar dhe si njeri. Ai thekson se libri është një eksplorim i raporteve familjare, emocioneve dhe historive të fshehura brenda një familjeje të zakonshme shqiptare, duke përdorur një strukturë ku e njëjta ngjarje shihet nga këndvështrime të ndryshme, duke krijuar kështu një mozaik të pasur dhe kompleks të jetës./L.F-dritare.net
