Rritet numri i pacientëve me koronavirus në Infektiv!
E Diel 22 Mars 2020, 11:11
Dritare.net
Drejtoresha e Institutit të Shëndetit Publik, Albana Fico, përmes një deklarate për shtyp, dha lajmet e fundit lidhur me situatën aktuale të koronavirusit në vend.
Në 24 orët e fundit janë testuar 33 persona të dyshuar, prej të cilëve janë konfirmuar 13 raste të reja me COVID-19:
- 8 qytetarë nga Tirana, 1 nga Kavaja, 1 nga Durrësi dhe 3 qytetarë nga Korça.
Deri në këto momente janë testuar 804 raste të dyshuara dhe prej tyre janë të konfirmuar pozitivë me COVID-19, 89 raste.
Nga totali i rasteve të konfirmuara, 58% janë meshkuj dhe 42% janë femra. Mosha mesatare e totalit të rasteve pozitive është 48 vjeç. Ndërsa shpërndarja gjeografike e rasteve pozitive, është si vijon:
• Tiranë - 63 qytetarë
• Durrës - 6 qytetarë
• Lushnje - 2 qytetarë
• Elbasan - 2 qytetarë
• Fier - 8 qytetarë
• Rrogozhinë - 2 qytetarë
• Kavajë - 3 qytetarë
• Korçë - 3 qytetarë
Ju informojmë se tre pacientët e parë kanë lënë aktualisht spitalin të shëruar por theksojmë se, pas daljes nga spitali, pacientët e rikuperuar duhet të qëndrojnë në vetëkarantinim edhe për 14 ditë të tjera, duke ndjekur masat e kontrollit respirator dhe higjienën personale.
Ndërsa është rritur numri i pacientëve të shtruar në spitalin Infektiv, ku ndodhen aktualisht 43 pacientë.
4 prej tyre janë në terapi intensive, në situatë të njëjtë klinike. Ndërsa pjesa tjetër e të shtruarve në pavion janë në gjendje të stabilizuar deri në këto momente.
Mosha mesatare e rasteve të hospitalizuara është 54 vjeç.
Jemi duke vijuar me testimin e rasteve të dyshuara, si element i rëndësishëm për ndërprerjen e zinxhirit të transmetimit të infeksionit COVID-19”, njoftoi sot ministria./L.F-dritare.net
