Pas 10 ditësh protestë, dalin emrat e organizatorëve. Kërkesë KQZ-së për ndryshimin e Kodit Zgjedhor
E Martë 9 Qershor 2026, 21:09
Dritare.net
Qytetarët që prej 10 ditësh po protestojnë para Kryeministrisë kanë ndërmarrë hapin e parë politik, duke iu drejtuar Komisionit Qendror të Zgjedhjeve me një kërkesë zyrtare për t’u pajisur me formularin e nevojshëm për mbledhjen e firmave në funksion të një nisme ligjvënëse për ndryshime në Kodin Zgjedhor.
Kërkesa, e datës së sotme, është depozituar në emër të “Veprimit Qytetar për Demokraci Funksionale” dhe mban firmat e 10 përfaqësuesve të shoqërisë civile. Në krye të nismës figuron ish-kreu i KQZ-së, Kristaq Kume, ndërsa mes firmëtarëve janë edhe Andi Tepelena dhe Edlira Çepani.
Në dokument thuhet se periudha për mbledhjen e firmave të zgjedhësve që do të mbështesin këtë nismë do të zgjasë tre muaj nga momenti kur KQZ-ja do t’i pajisë me fletën tip përkatëse./dritare.net
