Mesazh për kreun e ri të BKH: Mos u bëj vegël e asnjë politikani!
E Martë 2 Dhjetor 2025, 19:07
Dritare.net
Ish-drejtori i Policisë, Veli Myftari në Dekalog, Dritare TV dha një mesazh për emërimin e Joni Ketës në krye të Byrosë Kombëtare të Hetimit (BKH).
Myftari, i cili njeh personalisht babain e Jonit, ish-prokurorin Hysen Keta, shprehu vlerësim maksimal për integritetin e familjes nga vjen drejtuesi i ri.
Ai e cilësoi këtë emërim si një shpresë për rigjallërimin e luftës kundër krimit dhe korrupsionit të nivelit të lartë.
Megjithatë, urimi i Myftarit u shoqërua me një paralajmërim të fortë. Ai i dha një këshillë publike Joni Ketës: 'Largohu nga tendencat që mbështesin politikën negative. Mos u bëj vegël e asnjë politikani, sepse ata të marrin çfarë duan dhe pastaj nuk të lënë të bësh detyrën’.
Myftari theksoi se suksesi në një detyrë kaq delikate varet tërësisht nga pavarësia dhe pastërtia e figurës. Ai solli shembullin e tij personal, ku parimi kryesor ishte moslidhja pas qerres së asnjë politikani, gjë që i mundësoi të godiste krimin pa kompromise.
Myftari u shpreh se BKH ka një rol jetik në pastrimin e shtetit dhe se pritshmëritë e publikut janë të mëdha.
Ai kërkoi që Keta të ndjekë gjurmët e paraardhëses së tij (duke nënkuptuar integritetin, edhe pse pati rezerva për efikasitetin e përgjithshëm të strukturave deri tani) dhe të tregojë guxim përballë presioneve. Sipas tij, të gjithë zyrtarët e rinj të drejtësisë duhet të distancohen nga politika./dritare.net
