Merret vendimi/ BE nuk hap kufijtë me Shqipërinë
E Martë 30 Qershor 2020, 16:04
Dritare.net
Këshilli Evropian miratoi sot një rekomandim për heqjen graduale të kufizimeve të udhëtimit në vendet e Bashkimit Evropian. Kufizimet duhet të hiqen për vendet e listuara në rekomandimin e KE-së. Bazuar në kriteret dhe kushtet e përcaktuara në rekomandim, që nga 1 korriku vendet anëtare duhet të fillojnë të hapin kufijtë për rezidentët e vendeve të treta si:
Algjeria
Australia
Kanadaja
Gjeorgjia
Japonia
Mali i Zi
Maroku
Zelanda e Re
Rwanda
Serbia
Koreja e Jugut
Tajlanda
Tunizia
Uruguay
Kina, subjekt i konfirmimit të reciprocitetit
Sipas këtij rekomandimi, rezidentët e Andorrës, Monakos, San Marinos dhe Vatikanit duhet të konsiderohen si rezidentë të BE-së. Në këtë listë nuk është përfshirë Shqipëria, duke e shtyrë edhe për dy javë të tjera udhëtimin në vendet e BE-së. Po ashtu edhe Amerika me Brazilin nuk janë pjesë e kësaj liste, informon dritare.net
Kriteret që u morën për bazë në këtë vendim përfshijnë situatën epidemiologjike, masat e kontrollit, distancimin fizik, si dhe faktorët ekonomikë dhe socialë, thuhet në faqen zyrtare të Këshillit të Evropës.
Por ka një kategori njerëzish që përjashtohen nga kufizimet në vendet që nuk janë në listë:
-Qytetarët e BE-së dhe anëtarët e familjes së tyre
-Rezidentët afatgjatë të BE-së dhe anëtarët e familjes së tyre
-Ata që e kanë të nevojshme udhëtimin.
Vendet e lidhura me Shengenin (Islanda, Lichtenstein, Norvegjia, Zvicra) gjithashtu përfshihen në këtë rekomandim.
Rekomandimi i Këshillit nuk është ligjërisht i detyrueshëm. Autoritetet e shteteve anëtare janë përgjegjëse për zbatimin e rekomandimit. Ato vende, me transparencë të plotë, mund të heqin kufizimet në mënyrë progresive vetëm me vendet e listuara. Një shtet anëtar në BE, nuk duhet t’i heqë kufizimet me vendet e treta që nuk janë në listë. Kjo listë do të përditësohet nga Këshilli Evropian pas dy javësh./K.C/dritare.net
