Ish-kompleksi Partizani/ Adriatik Doçi: Pse u thirrën Genc Ruli dhe Fatmir Mediu në SPAK!
E Premte 30 Shtator 2022, 19:07
Dritare.net
Në emisionin “Java në Dritare” nga Lorena Fjolla ishte i ftuar gazetari investigativ Adriatik Doçi për të folur lidhur me privatizimin e ish-klubit sportiv Partizani, tashmë të kthyer në një kompleks gjigand pallatesh, dhe rikthimin e kësaj çështje në vëmendjen e SPAK.
Në studion e Dritare TV diskutua për prapaskenat e kësaj çështje dhe emrat e rëndësishëm të politkës të përfshirë në të.
“Privatizimi i këtij kompleksi ka nisur në 1996. Në atë kohë kryetari i kthimit të pronave ishte i caktuar nga Presidenti i asaj kohE, zoti Sali Berisha dhe trashëgimtarët pretendentë të pronës u njohën si ish-pronarë dhe ata kishin të drejtën, që nëse privatizohej një ditë prona shtetërore, kishin të drejtën e para-blerjes. Ose duhet të shpronësoheshin nga shteti sipas ligjeve në fuqi, duke marrë kompensim financiar. Pra ka nisur që nga 1996. Në atë kohë, duke qenë se ndërroi pushteti një vit më pas, trashëgimtarët pretendentë të pronës, ndërprenë çdo veprim dhe procedure ligjore për t’u kompensuar financiarisht apo për të kthyer pronën, duke qenë se në pushtet erdhi një parti tjetër, PS. Nuk menduan që PS do kishte nje qasje pozitive ndaj tyre për të marrë pronën.
Sapo Sali Berisha u kthye në pushtet pas 8 viteve, në shtator të vitit 2005, 3 muaj pasi u kthye në pushtet nisën sërish procedurat për kthimin e pronës publike, ish-klubi Partizani në Tiranë. Procedurat kanë nisur nga një shkresë e ministrit të atëhershëm të Ekonomisë, Genc Ruli, i cili i kërkon ministrit të Mbrojtjes Fatmir Mediu mendim për nisjen e procedurës së privatizimit. Kjo shkresë e Rulit ka marrë një konfirmim pozitiv nga Mediu dhe kjo është një ng arsyet që Mediu dhe Ruli janë thirrur ditët e fundit në SPAK, sepse kanë marrë pjesë me firmat e tyre në këtë procedurë, që është në fakt një operacion korruptiv me disa pika të errëta.”, u shpreh zoti Doçi në Dritare TV./M.K/dritare.net
