Ish-kapiteni i “Vlorës” rrëfen të gjithë eksodin e gushtit ‘91: Nga Kuba, në Durrës, Brindizi e Bari, deri në kthimin në atdhe
E Premte 5 Shtator 2025, 19:07
Dritare.net
Ish-kapiteni i anijes tregtare “Vlora”, Halim Milaqi ka rrëfyer për herë të parë në Shqip nga Rudina Xhunga në DritareTv, të gjithë historinë dramatike të gushtit 1991, kur anija u kthye në simbol të eksodit shqiptar drejt Italisë.
“Vlora” vinte nga Kuba, e ngarkuar me sheqer, kur ndaloi në portin e Durrësit. Pikërisht aty nisi gjithçka. Mijëra shqiptarë të dëshpëruar hipën në bord dhe e detyruan ekuipazhin të lundronte drejt Italisë. Kapiteni kujton se ishte një moment i pakontrollueshëm: “Nuk mund ta ndaloja më. Anija u mbush përtej kapacitetit dhe njerëzit kërkonin vetëm të largoheshin.”
Pas një udhëtimi të rrezikshëm në Adriatik, kapiteni kërkoi ndalesë në Brindizi, por autoritetet italiane nuk lejuan hyrjen. Anija u drejtua më pas për në Bari, ku ndodhi edhe zbarkimi dramatik në port e më pas në stadiumin “Della Vittoria”. Helikopterët italianë e monitoronin nga ajri, ndërsa mijëra shqiptarë, të rraskapitur, kërkonin strehim.
Kapiteni kujton tensionin, frikën, por edhe përkushtimin e ekuipazhit për të ruajtur qetësinë dhe sigurinë e udhëtimit. “Nuk ishim më në një udhëtim tregtar, por në një mision mbijetese,” thotë ai.
Pas një muaji qëndrimi në Itali dhe procedurash të stërzgjatura, anija “Vlora” u kthye në Shqipëri. Ndërkohë, mbi 20 mijë shqiptarë që ndodheshin në bord u kthyen në atdhe, duke shënuar një nga episodet më dramatike të historisë së emigracionit shqiptar.
“Vlora” mbeti përgjithmonë simboli i eksodit, ndërsa dëshmia e kapitenit është sot një kujtesë e gjallë e asaj kohe, kur dëshpërimi dhe shpresa për një jetë më të mirë i shtynë shqiptarët të sfidonin detin dhe të ardhmen./dritare.net
