Gazeta TemA i përgjigjet presidentit Meta pas fyerjeve të sotme
E Hënë 22 Shkurt 2021, 00:12
Dritare.net
Ilir Meta e ka cilësuar sot gazetën TemA, si media e kapur nga Rama që do të frenojë presidentin nga bërja e detyrës së tij. Meta thotë se, gazeta TemA ka shpifur kundër tij.
“Referendumi i 25 prillit do të përmbysë me votë plebishitare klikën oligarkike, që rrjep dhe mashtron shqiptarët prej kohësh. Tmerri i tyre është angazhimi publik i Presidentit të Republikës në mbrojtje të Kushtetutës dhe votës së lirë. Ndaj me gënjeshtra të orkestruara nga kryeoligarku e të bëra publike në mediat e kapura prej tij, kujtojnë se do të frenojnë Presidentin të bëjë detyrën kushtetuese për të mbrojtur votën e lirë të qytetarëve shqiptarë, që është fuqia dhe e ardhmja e tyre. Kot lodhen me shpifje, shantazhe, frikësime, gjoba arbitrare, fabrikime sondazhesh të gënjeshtra për të demoralizuar qytetarët të votojnë apo me blerje “opozitarësh”, që kurrë nuk kanë mbrojtur interesin publik e kombëtar por që mendojnë vetëm për “përsheshin” e radhës. Shqiptarët do të votojnë më 25 prill 2021 për lirinë e dinjitetin e tyre, si asnjëherë më parë në këto 30 vite. Më 25 prill 2021, Demokracia do triumfojë mbi oligarkinë dhe qytetaria mbi marrëzinë. Presidenti ka vetëm një votë, si çdo qytetar i këtij vendi dhe do të votojë kundër oligarkisë, që ka nëpërkëmbur Kushtetutën, ligjet dhe të drejtat e njeriut dhe që po mban peng të ardhmen europiane të vendit. Një garanci më shumë se Referendumi do triumfojë në 25 prill është edhe rreshtimi kundër tij, i Gazetës Tema, të denoncuar edhe në raportin e Parlamentit Europian, si media më e pabesueshme në Shqipëri e Europë dhe si një nga shpërndarëset më të mëdha të lajmeve të rreme. Ja një tjetër provë se si takimin publik të bërë në Selenicë nga Presidenti në datën 18 janar 2021, për çështjen e rrugës, kjo gazetë e paraqet si takim me veteranë për LSI”, shkruan Meta në Facebook.
Ndërkohë, botuesi i gazetës TemA, Mero Baze, i është kundërpërgjigjur Metës.
“Ilir Meta u ka bërë thirrje shqiptarëve ta kthejnë 25 prillin në referendum kundër gazetës TemA. Me sa duket e nisi si betejë politike kundër Edi Ramës dhe po e përfundon si rival i gazetës TemA meqë është pronar ilegal shtypi. Ilir! Nuk ta ka fajin gazeta TemA që investon në media të dështuara dhe shpif në emër të Parlamentit Evropian. Ai raport që shtrembëron ti e vlerëson gazetën Tema si median më të madhe investigative në vend ndersa TV Syrin ku hedh paratë dhe pronen tende, si prodhues të lajmeve të rreme. Por meqë jemi tek referendumi, në fakt referendum e kemi çdo ditë se janë 1 milionë lexues që na klikojnë. Nuk di sa votues do të ngelen deri më 25 prill, por 1 milion shuplaka nga TemA do ti kesh.”,- shprehet Baze./K.C/dritare.net
