Çelet kampusi "Barleti"/ Veliaj: Po ndërtohen 20 shkolla të reja, jam pak xheloz sepse ju jeni gati, ne do të jemi në vjeshtë!
E Enjte 10 Qershor 2021, 18:06
Dritare.net
Universiteti “Barleti” hapi dje dyert e kampusit më të ri universitar në Shqipëri. Me një frymë të re në botën e mësimdhënies dhe prej 16 vitesh në sektorin e Arsimit të Lartë, Barleti vjen me një dimension të ri. Të pranishëm në inaugurimin e kampusit të ri ishin personalitete të vendit si: ish Presidentë të Republikës së Shqipërisë z. Alfred Mojsiu dhe z. Bamir Topi, përfaqësues të Trupit Diplomatik të
akredituar në Shqipëri, Ministrja e Financave znj. Anila Denaj, Ministri për Mbrojtjen e Sipërmarrjes z. Eduard Shalsi, Kryetari i Bashkisë Tiranë z. Erion Veliaj, bashkëpunëtorë të Universitetit Barleti, kolegë të Universiteteve të tjera dhe partnerë të universitetit, stafi akademik dhe administrativ i universitetit, si dhe studentë.
I themeluar në vitin 2005 ka në përbërjen e tij 46 programe studimi, 10 Departamente, 5 Institute dhe 3 Fakultete. Në rrugëtimin e tij, Universiteti Barleti ka mundësuar jo vetëm studime profesionale dhe të aplikuara universitare por dhe shërbime të testimit dhe trajnimit të vazhdueshëm dhe licencimit, nëpërmjet bashkëpunimeve të shumta me organizma profesionale.
Me akreditim maksimal nga Agjencia Britanike e Akreditimit, Universiteti Barleti është lider në arsimin e lartë në Shqipëri.
Kryetari i Bashkisë Tiranë, z. Erion Veliaj përgëzoi për realizimin e kampusit më
të ri universitar, i cili sjell një frymë të re dhe një koncept të ri në botën e mësimdhënies. “Sa herë mendoj zhvillimin që kemi, ndonjëherë mendoj se na zë një zhvillim i madh, po ndërtohen rreth 20 shkolla të reja në Tiranë por si gjithmonë privati është përpara publikut dhe sot jam shumë krenar dhe pak xheloz sepse ju jeni gati ndërsa ne, shkollat tona do i hapim në shtator ose tetor”,
u shpreh z. Veliaj në fjalën e tij.
Studentët e Universitetit “Barleti” do të studiojnë në një universitet me qasje perëndimore, staf të kualifikuar akademik dhe ambiente bashkëkohore të gjendura në një universitet urban në zemër të Tiranës. Në përbërjen e tij, kampusi më i ri universitar në Tiranë ka hapësira multi-funksionale të cilat mund të adaptohen lehtë në varësi të aktiviteteve, klasa teknologjike të pajisura me mjetet e fjalës së fundit, ambiente Co-working, laboratorë teknologjik, punishte “Maker Space”, Terminali i Biznesit, Atelier për Kreativitetin, sallë teatri, palestër, zona Expo Hall; Open Air Cinema dhe Etno Bar dhe restorant. Kampusi më i ri Universitar në Shqipëri, mirëpret studentët e gjeneratës së parë dhe Barletasit tanë të cilët do të kenë një shtëpi të re multi-funksionale./dritare.net
