Ish-deputeti shërohet nga Covid-19: Kjo e keqe nuk kaloi pa dhënë një goditje
E Martë 4 Gusht 2020, 12:12
Dritare.net
Është shëruar nga Covid-19, ish-deputeti i Partisë Socialiste, Fatmir Toçi. Lajmin e ka bërë të ditur vetë ai përmes një postimi në Facebook. Toçi shprehet se, është lajm i gëzueshëm fakti që në trup nuk ka më virus, por sipas tij, kjo e keqe i dha një goditje në mushkëri, dhe për pasojë do të jetë nën kujdesin e mjekëve edhe për ca kohë. Ish-deputeti falënderon mjekët që iu gjendën pranë në ditët e vështira dhe që po rikthejnë në jetë.
"NEGATIV
Pas 25 ditësh nga testimi i tamponit të parë, dje u krye testimi i tamponit të dytë, i cili rezultoi NEGATIV
Ky është një lajm i gëzueshëm, entuziast e shpresëdhënës, tashmë nuk ka më virus Covid-19 në trupin tim, edhe pse kjo e keqe nuk kaloi pa dhënë një goditje në mushkëri, të cilën e ka prekur pjesërisht, duke më detyruar të mbetem edhe për ca kohë nën kujdesin e jashtëzakonshëm të mjekëve dhe specialistëve të Spitalit Universitar "Shefqet Ndroqi" në Sauk të Tiranës, ku organizon e drejton me dorë të hekurt prof. Perlat Kapisyzi me stafin e tij të mrekullueshëm.
Dua të mendoj, dhe besoj, që edhe në qendrat e tjera spitalore, të cilat janë angazhuar në luftën anticovid është i njëjti impenjim dhe të njëjtat rezultate.
Nuk gjenden fjalët për të shprehur mirënjohjen dhe falënderimet për këta heronj të kohës sonë, që i janë përkushtuar me profesionalizëm dhe humanizëm jetës së të tjerëve, duke harruar shpesh edhe veten e tyre. Me ato që kam parë e shoh çdo ditë këtu, fjalët janë të varfra dhe nuk mund të shprehin as të njëmijtën e angazhimit njerëzor dhe të shpirtit të tyre fisnik, për t'ju shërbyer dhe për t'i shpëtuar jetët njerëzore.
Me përulësi përpara tyre, që m'u gjenden në ditët më të vështira të jetës sime dhe po më rikthejnë në jetë!", shkruan Toçi./K.C/dritare.net
