Skema piramidale! Braçe publikon mesazhet: Bllokohen paratë e qytetarëve!
E Diel 31 Gusht 2025, 19:07
Dritare.net
Erion Braçe ka bërë një tjetër denoncim publik lidhur me funksionimin e një skeme piramidale me bazë në Divjakë dhe Lushnjë.
Lexo edhe:
Në një postim në rrjete sociale, ai ka publikuar mesazhe të shkëmbyera në grupet e mbyllura të kësaj skeme, të quajtur Xuex, ku sipas tij, brenda 48 orëve është bllokuar çdo tërheqje parash nga anëtarët.
Braçe shpjegon se drejtuesit e kësaj piramide, përmes një personi të identifikuar si “Leo Smith” i njohur edhe si “Profesori” apo “Roboti” kanë njoftuar se paratë nuk mund të tërhiqen më, duke u kaluar fillimisht në një “llogari-mur” të brendshme, më pas në Binance dhe në fund në një exchange në Kosovë, ku shndërrohen në para cash.
“E njëjta skemë u përdor edhe nga piramida Txex dhjetë ditë më parë. Sot e kësaj dite, askush në Divjakë apo Lezhë nuk ka mundur të tërheqë paratë e veta”- shkruan Braçe.
Sipas tij, veprimet e raportuara përbëjnë “krim të plotë mashtrimi dhe grabitjeje”, ndërsa shton se ky fenomen nuk është i izoluar vetëm në Shqipëri. Nga mesazhet e publikuara, rezulton se edhe shqiptarë që jetojnë jashtë vendit kanë investuar në këtë skemë, duke humbur paratë e tyre.
“Është e pabesueshme që pas traumës së vitit 1996-1997, shqiptarët ende bien pre e piramidave financiare. Ne nuk nxjerrim mësim”,- ka përfunduar Braçe./E.P-dritare.net
